Халыҡ фронты: Гуманитар конвойҙарҙың ирекмәндәре – үҙенсәлекле кешеләр төркөмө

Әммә тап махсус хәрби операция башланғас, волонтерлыҡ яңы кимәлгә сыҡты. Башҡортостанда, тотош илдәге кеүек үк, меңдәрсә ирекмән маскировка селтәрҙәре үрә, кейем-һалым һәм экипировка тегә, блиндаж шәмдәрен ҡойа, fpv-дрондар йыя, туҡмас һәм тушенка яһай. Ошо ғәйәт ҙур волонтерҙар командаһында гуманитар конвойҙарҙың ирекмәндәре айырым урын биләй.

"Ай һайын яугирҙәргә йыйылған ярҙамды еткереү өсөн "таҫма артына" сыҡҡан егеттәр – ул кешеләрҙең үҙенсәлекле төркөмө. Улар ваҡыт менән дә, сөнки төп эште берәү ҙә туҡтатмаған, матди сығымдар менән дә, унһыҙ бер сәфәр ҙә мөмкин түгел, ғаилә эштәре менән дә иҫәпләшмәй. Автоволонтерҙарыбыҙ ярҙамды окоптарға алып барып еткереү өсөн йыш ҡына ғүмерҙәрен ҡурҡыныс аҫтына ҡуя. Адреслы йыйымдарҙы даими ойоштора, подразделениелар менән бәйләнеш тота, башҡа ирекмәндәр берләшмәләре менән хеҙмәттәшлек итә. Тағы ла киләһе сәфәргә машиналарҙы тәртипкә килтерергә кәрәк, сөнки, тәжрибә күрһәтеүенсә, һәр техника кешеләр күтәрә алғанды күтәрә алмай", – тип билдәләне Башҡортостан Республикаһындағы Халыҡ фронты етәксеһе Виталий Брыкин.

"Еңеү өсөн" ("Za Победу") фекерҙәштәр төркөмөнөң, Халыҡ фронты партнерҙарының эшмәкәрлеге бер нисә ҡап башҡорт балынан башланды. Бөгөн иһә 100-ҙән ашыу активисты берләштергән берләшмә ай һайын алғы һыҙыҡҡа 7 тонна самаһы ярҙам килтерә.

"2022 йылдың апреленән беҙҙең төркөм махсус хәрби операция зонаһына 35 тапҡыр барҙы, ә 2024 йылдың декабренән гумконвой Курск-Белгород йүнәлешенә ойошторолдо. Хәрби подразделениеларға, шулай уҡ хәрби подразделениелар составындағы медицина учреждениеларына һәм медицина частарына ярҙам итәбеҙ. Тыныс халыҡҡа ла ярҙам итергә тырышабыҙ. Луганск, Перевальск һәм Антрацит балалар йорттарына, Луганск район балалар дауаханаһы ҡарамағындағы Сурдологик һәм логопедия ярҙамы үҙәгенә, Луганскийҙағы Александр Невскийҙың ғибәҙәтханаһына йөрөүселәргә ярҙам күрһәтәбеҙ", – тип һөйләне "Еңеү өсөн" фекерҙәштәр төркөмөнөң координаторы Андрей Лукьянов.

Медицина ҡорамалдары, дарыуҙар, экипировкалар, шәхси гигиена әйберҙәре, ҡиммәтле техника, махсус элемтә сараларынан тыш, ирекмәндәр яугирҙәргә әүҙемселәрҙең үҙҙәренең, шулай уҡ Халыҡ фронты һәм ябай граждандарҙың бушлай тапшырған 20 берәмек транспорт техникаһын тапшырҙы.

"Бер тапҡыр "таҫма артына" барып, яугирҙәр менән осрашһаң, унда ҡабат бармай булдыра алмайһың. Әлеге ваҡытта окоптағы егеттәргә беҙҙең ярҙам кәрәк, улар үҙҙәренең артында ышаныслы һәм көслө тыл икәнлеген белергә тейеш. Беҙҙең өсөн ил һаҡсыларына ярҙам итеү – ул намыҫ эше, еңеүгә индергән өлөшөбөҙ", – тине "Еңеү өсөн" фекерҙәштәр төркөмөнөң координаторы Азамат Ғилмуллин.