Район мәҙәниәт йорто автобусын яңыртты

Был проектты, “Мәҙәниәт” милли проектына ярашлы, “Берҙәм Рәсәй” партияһы ғәмәлгә ашыра. Конкурс буйынса һайлап алынып, мәҙәниәт учреж­дениела­рының матди-техник базаһын нығытыуға аҡса бүленә. Район мәҙәниәт йорто ла шул проект ярҙамында транспорт сараһын яңыртты.

– Быны беҙ күптән көтә инек. Сөнки 2003 йылдан бирле автобусыбыҙ яңыр­тылғаны юҡ ине, – тип шатлығы менән уртаҡлашты район мәҙәниәт бүлеге начальнигы Илнур Вәлиев (һүрәттә). – БР Мәҙәниәт министрлығы аша был проектта райондан өс учреждение ҡатнашты. Торналы ауыл мәҙәниәт йорто (мөдире – Винера Садиҡова) конкурстан үтте. “Берҙәм Рәсәй” партияһының “Бәләкәй тыуған илемдең мәҙәниәте” федераль проекты буйынса 4 млн. һум күләмендә грант оттоҡ. Шул аҡсаға районға микроавтобус алдыҡ, ә Торналы клубы фольклор-бейеү, вокаль ансамблдәр һәм алып барыусылар өсөн костюмдар, итектәр, сәхнәгә музыкаль-яҡтыртҡыс һәм мультимедия ҡоролмалары һатып аласаҡ. Шулай уҡ исемлектә музыка ҡоралдарынан ҡурай, ҡумыҙ, мандолина, гармун, акустик гитара, спорт инвентарҙары: бильярд, теннис өҫтәлдәре, өҫтәл уйындары, велотренажер ҙа бар. Проект ярҙамында Торналы ауылының мәҙәни тормошо тағы ла яҡшырыр, тип ышанабыҙ.
Ә 16 пассажир урынлы “Газель-Некст” микроавтобусында район мәҙәниәт хеҙмәткәрҙәре төрлө сараларға йөрөйәсәк. Коронавирус менән бәйле сикләүҙәр бөтһөн генә. Ижади коллективтар, Балалар сәнғәт мәктәбенең йәш таланттары район, район-ара, республика, төбәк-ара, Бөтә Рәсәй конкурс-фестивалдәренә барасаҡ, артистар концерттар менән сығасаҡ. Яңы микроавтобус тәжрибәле водитель Владимир Токарьға беркетелгән.