Алдан пенсияға сығыу өсөн ниндәй шарттар кәрәк?

Пенсия закондары нигеҙендә 5 һәм унан күберәк бала табып, уларҙы 8 йәшкә тиклем тәрбиәләп үҫтергән күп балалы әсәләр ҡартлыҡ буйынса 50 йәштән пенсия тәғәйенләтеү хоҡуғына эйә.

Алдан пенсияға сығыу өсөн күп балалы әсәләргә 15 йыл страховка стажы талап ителә, бында баланы йәш ярымға тиклем тәрбиәләү шарт, әммә дөйөм 6 йылдан артмаҫҡа тейеш. Шулай уҡ 50 йәштән пенсияға Себерҙә эшләүсе ике һәм унан күберәк балаһы булған ҡатындар һәм унда 12 йыл эшләү стажы булһа; инвалид бала ҡараған, уны 8 йәшкәсә тәрбиәләгән ата-әсә (опекун) сыға ала.
Пенсия законына ярашлы, өс һәм дүрт балалы ҡатындарҙың да ваҡытынан алда хаҡлы ялға сығырға мөмкинлеге бар. Өс балалы әсә – 57 йәштән, дүрт балалы 56 йәштән сыға ала. Башҡортостанда биш һәм унан күберәк балаһы булған 54 ҡатынға ваҡытынан алда пенсия тәғәйенләнде.