+29 °С
Облачно
Новости
23 Ноября 2016, 09:48
«Илһам»дан илһам алып
Малаяҙ Балалар сәнғәт мәктәбенең 25 уҡыусыһы Өфө ҡалаһында үткән Бөтә Рәсәй “Өн тылсымы” һәм «Илһам» халыҡ-ара конкурстарында ҡатнашып, яңынан-яңы еңеүҙәр менән ҡайтты.
“Өн тылсымы” Бөтә Рәсәй конкурсында беҙҙең тәрбиәләнеүселәребеҙ тәүләп ҡатнашып, яҡшы ғына һөҙөмтәләр күрһәтте. Конкуренция бик көслө булыуға ҡарамаҫтан, алты уҡыусыбыҙ дипломдар менән билдәләнде.
«Илһам» халыҡ-ара фестиваль-конкурсында уҡыусыларыбыҙ йылдың-йылы яҡшы һөҙөмтәләр күрһәтә. Был юлы ла уҡытыусы Радик Хановтың һуҡма инструменттар класы уҡыусыһы Ринат Монасов (һүрәттә) ксилофонда ҡатмарлы әҫәрҙәр уйнап, II дәрәжә лауреат исеменә лайыҡ булды.
Ҡурай класында уҡыусы Йәлил Кәримов (етәксеһе – Р. Нурмөхәмәтов) I дәрәжә дипломант исемен яуланы.
Йәш пианистарҙан Элиза Исламова (етәксеһе – С. Заһиҙуллина), Кристина Баймөхәмәтова менән Роксана Хәмиҙуллина (етәксеһе – М. Фәйзуллина) II дәрәжә дипломанттар булды.
Ансамбль дуэттары Алина Лобова менән Софья Кисмерешкина, Карина Заһретдинова һәм Айгөл Ғәйфуллина – (етәкселәр – С. Кузнецова, М. Фәйзуллина) – III дәрәжә дипломанттар.
Сәнғәт мәктәбенең “Гүзәл” бейеү ансамбле бик сағыу, матур ике бейеү күрһәтеп, дипломанттар исемен алды. Уларҙы етәксеһе Резеда Арсланова әҙерләне.
Шулай уҡ конкурста преподаватель Нурдания Вәлиуллинанынң тәрбиәселәре баян буйынса оҫталыҡтарын күрһәтте. Баян класының 2-се класс уҡыусыһы Тимур Усманов конкурста тәүләп ҡатнашып, яҡшы һөҙөмтә күрһәтә алды – III дәрәжә дипломант булды. Илнур Имаев, Илшат Мөхәмәтйәнов, Александр Чернышев та дипломант исемдәрен алды.
Афарин, малайҙар һәм ҡыҙҙар! Һеҙгә яңынан-яңы үрҙәр теләп ҡалабыҙ.
Анфиса Хөснөтдинова,
Балалар сәнғәт мәктәбе директоры.