Башҡортостан "Беҙ бергә. Спорт" ҡышҡы спартакиадаға әҙерләнә

Ярыштарҙың төп өлөшө (саңғы ярыштары, сноуборд, хоккей, футзал һәм шахмат) Өфөнөң спорт объекттарында, "керлинг" дисциплинаһы – Ишембайҙа ("Батыр" спорт мәктәбе), "тау саңғыһы спорты" "Металлург-Магнитогорск" тау саңғыһы үҙәге биләмәһендә үтәсәк. "Молодежная газета" баҫмаһы яҙыуынса, Башҡортостан Республикаһының йыйылма командаһы составында 30-ҙан ашыу спортсы сығыш яһаясаҡ.

– Башҡортостан Республикаһы ҙур халыҡ-ара һәм бөтә Рәсәй ярыштарын үткәреү буйынса ҙур тәжрибәгә эйә, шулай уҡ заманса спорт һәм тейешле инфраструктура менән тәьмин ителгән. "Беҙ бергә. Спорт" спартакиадаһы берҙәмлек, ғәҙел һәм тиң спорт идеяларын һәм ҡиммәттәрен үҫтереүҙә бөтә спорт берләшмәһе өсөн сағыу һәм ҙур сара, дәртләндереү сараһы һәм өлгө буласаҡ, – тине Башҡортостан Хөкүмәте Премьер-министры урынбаҫары вазифаһын башҡарыусы – спорт министры Руслан Хәбибов.

Спартакиаданы асыу тантанаһы 8 февралдә Өфөнөң Көрәш һарайында үтәсәк, ә уны ябыу тантанаһы 14 февралдә Спорт һарайында үтәсәк.

Иҫегеҙгә төшөрәбеҙ, Башҡортостан сурдлимпия сараһында беренсе тапҡыр ғына ҡатнашмай: 2023 йылдың июлендә Өфөлә "Беҙ бергә. Спорт" Сурдлимпиясыларҙың йәйге уйындары үтте. Башҡортостанға донъяның 30 иленән 1620 спортсы килде. Халыҡ-ара ҡунаҡтар баһалауынса, ярыштар юғары кимәлдә үткән.