Өфөләге Көрәш һарайы бөтә илдән көрәшселәрҙе йыя

Башҡортостан Хөкүмәтенең матбуғат хеҙмәтендә белдереүҙәренсә, турнирҙа төрлө ауырлыҡ категорияларында 250 спортсы ҡатнаша. Уларҙың яртыһынан күберәге - Башҡортостандан. Турнирҙы БР Спорт министрлығы, БР Милли һәм билбаулы көрәш федерацияһы һәм Рәсәй Көрәш федерацияһы ойоштора, тип яҙа "Республика Башкортостан" гәзите.

- Көрәш буйынса турнир Рәсәйҙең төрлө төбәктәренән һәм спорт мәктәптәренән иң көслө көрәшселәрҙе йыя. Бәйгеселәрҙең байтаҡ өлөшөн Башҡортостан Республикаһы көрәшселәре - 130-ҙан ашыу спортсы тәшкил итәсәк. Был төбәктә көрәштең ҙур популярлыҡ яулауы һәм уны үҫтереүе, шулай уҡ Башҡортостандың ошо милли спорт төрөн һаҡлауға һәм популярлаштырыуға индергән тос өлөшө хаҡында һөйләй, - тип билдәләне Башҡортостандың спорт министры вазифаһын башҡарыусы Руслан Хәбибов.

Бөгөн көрәш Өфөлә, Әбйәлил, Әлшәй, Ауырғазы, Баймаҡ, Ейәнсура, Илеш, Стәрлебаш, Туймазы һәм Учалы райондарында әүҙем үҫешә. Һуңғы алты йылда республикала Рәсәйҙең спорт мастерына 76 кандидат, Рәсәйҙең ете спорт мастерын һәм Рәсәйҙең халыҡ-ара класлы бер спорт мастерын әҙерләгәндәр. Ә былтыр полиция генерал-лейтенанты Артур Әхмәтханов иҫтәлегенә арналған көрәш буйынса Бөтә Рәсәй турнирында Башҡортостан көрәшселәре 7 алтын, 10 көмөш һәм 19 бронза миҙал яуланы.

Фото: Башҡортостан Хөкүмәтенең матбуғат хеҙмәте