Рәсәйҙә физкультура хеҙмәттәре өсөн һалым ҡайтармаһын алыу ябайлаштырылды

Социаль ҡайтарманың бындай төрөн 2022 йылдан үҙең өсөн генә түгел, балалар өсөн дә алырға мөмкин. Иң тәүҙә фитнес-клубтың йәки башҡа учреждениеның Рәсәйҙең Спорт министрлығы төҙөгән исемлектә тороуы шарт. 2024 йылда уға 4088 физкультура-спорт ойошмаһы һәм шәхси эшҡыуар ингән. Ойошмаларҙың күбеһе Мәскәүҙә, Мәскәү өлкәһендә, Башҡортостанда, Свердловск өлкәһендә һәм Красноярск крайында урынлашҡан.

Еңелерәк булһын өсөн һалым түләүсенең күрһәтелгән физкультура-һауыҡтырыу хеҙмәттәренә сығымдарын раҫлаған бер төрлө документ индерелде. Ул ҡайтармаға хоҡуҡты раҫлаған барлыҡ документтарҙы алмаштыра.

Башинформ хәбәр иткәнсә, быйылдан һалым ҡайтармаларының лимиты арттырылды, шул иҫәптән һауыҡтырыу хеҙмәттәренә — 120-нән 150 мең һумғаса.