Баймаҡ районында «Башҡорт аты» икенсе халыҡ-ара фестивале үтә

Баймаҡ районында «Башҡорт аты» икенсе халыҡ-ара башҡорт тоҡомло аттар фестивален үткәреү буйынса ойоштороу комитетының күсмә кәңәшмәһе уҙғарылды. Унда Башҡортостан Башлығы Хакимиәте етәксеһенең эске сәйәсәт буйынса беренсе урынбаҫары Урал Килсенбаев, республика мәҙәниәт министры Әминә Шафиҡова, Баймаҡ районы башлығы Фәнис Әминев ҡатнашты.

Ҡатнашыусылар ошо фестивалде ойоштороу мәсьәләләрен тикшерҙе, үҙҙәренең идеялары һәм тәҡдимдәре менән уртаҡлашты. Атап әйткәндә, сара 11-13 августа Баймаҡ районының Граф күле биләмәһендә уҙа. Унда бөтә Рәсәйҙән йылҡысылыҡ өлкәһендәге белгестәр саҡырыласаҡ, улар Башҡортостан Республикаһында йылҡысылыҡ, ҡымыҙ эшләү һәм халыҡ кәсептәре традицияларын һаҡлау һәм үҫтереү, башҡорт тоҡомло атты үрсетеү һәм популярлаштырыу проблемаларын ҡараясаҡ.

Шулай уҡ ҡунаҡтарҙы һәм ҡатнашыусыларҙы бай спорт һәм мәҙәни программа көтә. Тамашасылар милли спорт төрҙәре буйынса ярыштар ҡарай ала, уларҙа яҡын сит илдәрҙән ҡунаҡтар - «Ылаҡ», «Тай-тулак», йәйәнән уҡ атыу ойошторола.

- Былтыр «Башҡорт аты» фестивале яҡшы кимәлдә уҙҙы һәм юғары потенциал күрһәтте. Ул ауыл хужалығын һәм тотош республика иҡтисадын үҫтереү өсөн бик кәрәк. Билдәле булыуынса, башҡорт тоҡомло аттар бик сыҙамлы, шуға күрә уларҙың тоҡомон һаҡларға кәрәк. Был бик ҡыҙыҡлы булыр һәм яҡын арала ошо фестиваль Рәсәй туристарын ғына түгел, сит ил туристарын йәлеп итеү урыны ла булыр, тип ышанабыҙ, - тип белдерҙе «Баймакский вестник» гәзитенә интервьюла Урал Килсенбаев.

Хәтерегеҙгә төшөрәбеҙ, «Башҡорт аты» I халыҡ-ара башҡорт тоҡомло аттар фестивале Башҡортостан Башлығы Радий Хәбировтың указы буйынса 2022 йылдың 29-30 июлендә Баймаҡ районында уҙҙы һәм шунан алып йыл һайын уҙғарыласаҡ. Фестиваль төбәктә йылҡысылыҡ, ҡымыҙ эшләү һәм халыҡ кәсептәре традицияларын һаҡлауға һәм үҫтереүгә, башҡорт тоҡомло атты популярлаштырыуға йүнәлтелгән.