Яҡташ яугирҙәргә – дүрт күсмә мунса

Республикала махсус хәрби операцияла ҡатнашҡан яугирҙәргә даими ярҙам итәләр. Республика башлығы Радий Хәбиров тура бәйләнеш ваҡытында махсус хәрби операцияла ҡатнашыусыларға рәхмәт белдерҙе һәм ауыр ваҡытта илдең берҙәмлегенең мөһимлеген һыҙыҡ өҫтөнә алды. Ул, ауыр эҙемтәләргә ҡарамаҫтан, был халыҡты берләштереү һәм операцияла ҡатнашыусыларҙың әһәмиәтен арттырыу өсөн стимул булды, тип билдәләне. Радий Фәрит улы билдәләүенсә, киләсәктә яугирҙәргә ярҙам итеү системаһы яҡшырасаҡ һәм яңы ихтыяждарға яраҡлаштырыласаҡ.

Салауат райоынында ла махсус хәрби операцияла ҡатнашҡан яугирҙарға даими гуманитар ярҙам оҙаталар. Дыуан күп профилле колледжының Малаяҙ филиалы уҡытыусыһы, Афғанстан ветераны Рөстәм Хөснуллин ҙур йәмәғәт эше алып бара. Ул 31 тапҡыр МХО зонаһында булған. Ул был юлы махсус хәрби операция зонаһына дүрт күсмә мунсаны "Шерхан", "Өфө" “Усман”,  һәм "Малой" шартлы ҡушаматлы яугирҙәргә алып барасаҡтар. Был эштә уға вайымһыҙ булмаған райондаштарыбыҙ булышҡан. Шәхси эшҡыуар Раүеф Әминев ике мунсаны профнастил менән тәьмин иткән. Мунса төҙөүҙә район танкистары, хәрби хәрәкәттәр ветерандары, Татар Малаяҙы, Тирмән, Нәсибаш ауыл биләмәләре ҙур ярҙам күрһәткән. Бынан тыш, Илвир Ғирфанов таҡталар менән тәьмин иткән, Винарис Минһажев мунсаға ступицалар һәм тәгәрмәстәр биргән. Шәхси эшҡыуар Айҙар Хисмәтуллин яугирҙарға шуруповерт, болгарка, дисклы бысаҡ һәм быраулау ҡоролмаһы бүләк иткән. 1-се Малаяҙ урта мәктәбе коллективы яугир-яҡташтарына 17 мең һум аҡса йыйған. Был аҡсаға улар шлифмашина, абразив түңәрәктәр, ҡаҙаҡтар, саморездар, быраулау, газ баллондары, газ яндырғыстары, балта, сүкеш, винт, таҫтамал һәм башҡа кәрәк-яраҡтар һатып алған. Шулай уҡ Малаяҙ үҙәк дауаханаһы коллективы бензобысҡы, һәм медикаменттар менән тәьмин иткән.

Салауат районы хәрби хәрәкәттәр ветерандары союзы етәксеһе Рөстәм Хөснуллин:

- Вайымһыҙ булмаған район халҡына ҙур рәхмәт әйтергә теләйем. Иретеп йәбештереүселәр Илгиз Вәлиев, Ринат Кулейкин, шулай уҡ мунса төҙөүҙә йыл дауамында ярҙам иткән Дыуан күп профилле колледж филиалының 21-се һәм 31-се төркөм студенттарын айырым билдәләргә теләйем. "Газель" автомобиле водителдәренә – Артур Хөснуллинға, Азат Исмәғилевҡа, Илдар Әхтәрйәновҡа ла рәхмәт - улар махсус хәрби операция башланғандан алып магазиндарҙан төҙөлөш материалдарын бушлай килтерә. - ти Рөстәм Нәбиулла улы.