Салауат районы иң яҡшы муниципалитеттар рәтенә инде

Башҡортостан Хөкүмәтенең оператив кәңәшмәһендә “Йыл ҡаҙанышы” республика рейтингыһында еңеүсе муниципалитеттар билдәләнде. Салауат районы “Мәғлүмәти асыҡлыҡ һәм халыҡ менән кире бәйләнеш” номинацияһында 3-сө урын алды. Башҡортостан Башлығы Радий Хәбиров Салауат районы хакимиәте башлығы Марс Кашаповҡа Диплом тапшырҙы.

Был номинацияла халыҡ менән үҙ-ара эш итеү буйынса системалы эш баһаланды: граждандарҙың мөрәжәғәттәренә яуаптарҙың сифаты һәм оперативлығы, кире бәйләнеште ойоштороу һәм социаль селтәрҙәрҙә әүҙемлек.

– Республика Хөкүмәтенә эшебеҙҙе юғары баһалағаны өсөн рәхмәт белдерәм. Беҙҙең өҫтөнлөк үҙгәрешһеҙ ҡала – районда йәшәүсе һәр кеше өсөн уңайлы шарттар булдырыу. Берҙәм булып, тырышып, беҙ яңы бейеклектәргә өлгәшә алырбыҙ һәм районыбыҙҙа тормошто тағы ла яҡшыраҡ итә алырбыҙ, тип ышанам, – тине бүләкләү тантанаһынан һуң Марс Фәррәх улы.

Фото: Башҡортостан Башлығының матбуғат хеҙмәте.