Салауат районы хакимиәте башлығы тәғәйенләнде

Бөгөн, 25 октябрҙә, Салауат районының алтынсы саҡырылыш Советының икенсе ултырышында конкурс һөҙөмтәләре буйынса район хакимиәте башлығын тәғәйенләү мәсьәләһе ҡаралды.

Конкурс комиссияһы рәйесе урынбаҫары, БР Башлығының Дәүләт хеҙмәте һәм кадрҙар сәйәсәте мәсьәләләре буйынса идаралығы начальнигы урынбаҫары Руслан Ғибаҙуллин хакимиәт башлығы вазифаһына конкурс һөҙөмтәләре менән таныштырҙы. Уның һүҙҙәренсә, конкурста өс кеше ҡатнашҡан. Конкурстың һуңғы турына, юғары балдар йыйып, уларҙың икеһе үткән.

Район Советы ултырышында депутаттар райондың элекке етәксеһе Марс Кашаповтың кандидатураһын бер тауыштан хупланы. Марс Фәррәх улын хакимиәт башлығы вазифаһына тәғәйенләнеүе менән БР Башлығының Дәүләт хеҙмәте һәм кадрҙар сәйәсәте мәсьәләләре буйынса идаралығы начальнигы урынбаҫары Руслан Ғибаҙуллин, район Советы рәйесе Ринат Әбдрәшитов ҡотланы.

Марс Кашапов яуаплы вазифаны йәнә уға ышанып тапшырғандары өсөн рәхмәт белдерҙе.

– Артҡа ҡараһаң – эшләпәңде һал, алға баҡһаң – еңдәреңде һыҙған, тигән аҡыллы әйтем бар. Беҙгә алдағы еңел булмаған осорҙо бергәләп үтергә тура киләсәк. Районда сәнәғәт, ауыл хужалығы, туризм, эшҡыуарлыҡ йүнәлештәре буйынса үҫешеү өсөн мөмкинлектәр күп. Беҙ алдыбыҙға ҡуйған бар бурыстарҙы йырып сығырбыҙ, тип ышанам, – тине Марс Фәррәх улы.   

Ултырыштан һуң район Советы рәйесе Ринат Әбдрәшитов менән район хакимиәте башлығы Марс Кашапов алдағы мөҙҙәткә контракт төҙөнө.

Хәтерегеҙгә төшөрәбеҙ, Марс Фәррәх улы Кашапов Салауат районына 2017 йылдан етәкселек итә.

Автор фотолары.