Башҡортостан йәмәғәтселәре һайлауҙа күҙәтеүсе буласаҡ

Улар иҫәбендә - Рәсәй адвокаттары гильдияһы, Йәштәр йәмәғәт палатаһы, Башҡортостандың Муниципаль берәмектәр советы, Башҡортостан Республикаһының Журналистар союзы, Йәштәр сәйәсәте лигаһы, Бөтә донъя башҡорттары ҡоролтайы, Рәсәй эҙәрмәндәр хәрәкәте, Йәштәр яҡташтар ойошмаһы һәм башҡалар.

Документ коммерцияға ҡарамаған ойошмаларҙың көстәрен берләштерергә һәм һайлауҙарҙың ғәҙеллеген, асыҡлығын тәьмин итеүгә әҙерлеген нығытты. Йәмәғәт палатаһы республиканың граждандар йәмғиәте вәкилдәре һайлау процесының бөтә этаптарына йәмәғәт контроле алып барыу мөмкинлегенә эйә булыуына гарантия булып тора.

- Беҙ Лига командаһы менән күҙәтеүсе булырға булдыҡ. Беҙгә тауыш биреүҙең бөтә механизмын өйрәнеү, уның нисек барғанын ҡарау һәм ошо хаҡта һөйләү ҡыҙыҡлы. Төп ролебеҙ - барыһы ла ғәҙел булһын өсөн күҙәтеү, - тине Йәштәр сәйәсәте лигаһы активисы Алёна Синицына.

Башҡортостанда һайлауҙарҙы күҙәтеү буйынса йәмәғәт штабы етәксеһе Лида Исаргакова билдәләүенсә, республикала президент һайлауҙа тауыш биреүҙе 10 меңгә яҡын күҙәтеүсе: табиптар, уҡытыусылар, эшҡыуарҙар, пенсионерҙар һәм хужабикәләр, студенттар һәм йәмәғәт эшмәкәрҙәре күҙәтә. Бөтә күҙәтеүселәр алдан әҙерлек үтә - һайлау процедураһы ҡағиҙәләрен, норматив-хоҡуҡи базаны һәм тауыш биреүҙең асыҡлығын тәьмин итергә мөмкинлек биргән бөтә кәрәкле ҡоралдарҙы өйрәнә.

- Башҡортостанда коммерцияға ҡарамаған көслө сектор, төбәк тормошонда әүҙем ҡатнашҡан битараф булмаған кешеләр күп. Әүҙем йәштәр күп. Президент һайлауҙары Башҡортостан территорияһында ғәҙел һәм асыҡ үтһен өсөн улар мөмкин булғандың барыһын да эшләргә әҙер, - тип һыҙыҡ өҫтөнә алды Лида Исаргакова.

Әүҙем һайлау хоҡуғына эйә булған бәлиғ булған Рәсәй гражданы күҙәтеүсе була ала. Был статусты һайлап ҡуйылған вазифалы кешеләр, депутаттар, урындағы хакимиәт башлыҡтары һәм уларҙың хеҙмәткәрҙәре, шулай уҡ прокурорҙар, судьялар һәм һайлау комиссиялары ағзалары ала алмай. Башҡортостанда йәмәғәт күҙәтеүселәре булырға теләүселәр республиканың Йәмәғәт палатаһына мөрәжәғәт итә ала.