Депутаттан мәсеткә ярҙам

Рәсәй Федераль Йыйылышы Дәүләт Думаһына Благовещен округы буйынса депутат итеп һай­ланған Илдар Зиннур улы өсөн Ахун тыуған ауылы кеүек яҡын. Уның әсәһе Рәйсә Мөхөтдин ҡыҙы – ошо ауылдан. Депутат Ахунда асылған яңы мәсеткә йылытҡыс материалдар менән ярҙам итергә ышандырған булған.

– Ул биргән вәғәҙәһендә торҙо, һайлауҙар алдынан, ауылға йөк машинаһы менән ҡайтып, кәрәкле материалдарҙы тап­шырҙы. Йылытҡыстар (минвата) Аллаһ йортон эшләүгә тото­ноласаҡ. Бынан һуң мәсеткә килеүсе халыҡ өсөн тағы ла уңайлыраҡ шарттар булыр, – ти Мәсетле ауыл биләмәһе башлығы Адик Асҡаров.

Депутат килгәнендә, ауыл хакимиәте башлығы Ахун халҡы исеменән ауылға газ үткәреү буйынса үтенесен дә бел­дергән. Адик Әбғәлим улы әйтеүенсә, “зәңгәр” яғыулыҡ үт­кәреүгә проект күптән әҙер, аҡса бүленеүе мөһим. Илдар Бикбаев был мәсьәләне хәл итеүҙә ярҙам итергә өмөт­ләндерҙе.

Мәскәүҙән килгән Дәүләт Думаһы депутаты Президент һайлағанда ла ауылда булған. Ул Ахундағы һайлау участкаһына иртәнге һигеҙҙән, иң тәүгеләрҙән килеп, тауыш бирҙе. Артабан Илдар Бикбаев Балаҡатай районына граждандарҙы ҡабул итергә юлланды.