«Китап байрамы» йәнә әҙәбиәт һөйөүселәрҙе, нәшриәтселәрҙе, авторҙарҙы берләштерә

Бер нисә йыл эсендә «Китап байрамы» әһәмиәтле халыҡ-ара мәҙәни диалог майҙансығына ғына түгел, илебеҙҙә иң күп кеше йөрөгән төбәк китап йәрминкәһенә лә әүерелде.

Йәрминкә йыл һайын Рәсәй төбәктәренән һәм сит илдәрҙән йөҙәрләгән ҡатнашыусыны йыя, ә килеүселәр һаны тиҫтәләрсә мең кеше менән иҫәпләнә. Башҡортостан Республикаһы йәрминкә йомғаҡтары буйынса «Рәсәйҙең әҙәби флагманы» статусына лайыҡ булды, был проекттың федераль кимәлдә ойошторолоу кимәленең юғары булыуын һәм әһәмиәтен билдәләй.

2025 йылда Башҡортостан Республикаһы менән Рәсәй китап союзы хеҙмәттәшлек тураһында килешеү төҙөнө. 2026 йылда «Китап байрамы» Союздың партнерлыҡ булышлығында уҙғарыла. Был һөнәри программаны киңәйтеү, алдынғы нәшриәттәр менән бәйләнештәрҙе нығытыу һәм проекттың федераль ҡатнашыуын көсәйтеү өсөн яңы мөмкинлектәр аса.

«Китап байрамы» – ул йәнле диалог, яңы асыштар һәм илһам киңлеге. Өс көн дауамында йәрминкәлә көн һайын иртәнге сәғәт 10.00-дан 22.00 сәғәткә тиклем бай программа тәҡдим ителәсәк: тематик зоналар, китап яңылыҡтары менән таныштырыу, яҙыусылар һәм нәшриәтселәр менән осрашыуҙар, автограф-сессиялар, бөтә ғаилә өсөн дискуссиялар һәм мәҙәни саралар.

Эшлекле һәм мәҙәни программа сиктәрендә йәрминкәнең һәр көнө бер тематик йүнәлештә үтә: беренсе көн халыҡтар берҙәмлегенә арнала, икенсеһе – традицион ғаилә ҡиммәттәренә, өсөнсөһө – Рәсәй тарихына, үткәндәрҙе хөрмәт итеүгә арнала.

Быйыл белем биреү программаһына айырыуса ҙур иғтибар бүленәсәк. Ул Рәсәйҙең «Белем» йәмғиәте ҡатнашлығында тормошҡа ашырыласаҡ һәм эксперттар менән лекциялар, асыҡ диалогтар, осрашыуҙар тәҡдим ителәсәк. Тарихи хәтер, гражданлыҡ яуаплылығы һәм илдең төп ваҡиғаларын заманса аңлау мәсьәләләренә арналған патриотик майҙансыҡ мөһим өлөш буласаҡ.

2026 йылда «Китап байрамы» IV халыҡ-ара китап йәрминкәһе Башҡортостан Республикаһының барлыҡ муниципалитеттарын үҙ эсенә ала – берҙәм Китап календары ҡала-райондарҙың төп ваҡиғаларын берләштерәсәк. Сараларға 27 майҙа, дөйөм Рәсәй Китапханалар көнөндә старт биреләсәк, был төбәк көн тәртибен федераль кимәлдәге менән синхронлаштыра.

«Китап байрамы» – йәрминкәгә ҡарағанда ҙурыраҡ сара. Был – мәҙәни көн тәртибен формалаштырыусы, уҡыуға ҡыҙыҡһыныу тәрбиәләүсе һәм Рәсәйҙең әҙәби тормошо үҙәктәренең береһе булараҡ Өфөнөң статусын нығытыусы ваҡиға.

Белешмә өсөн:
«Китап байрамы» халыҡ-ара китап йәрминкәһе Башҡортостан Башлығы тәҡдиме менән һәм Башҡортостан Хөкүмәте булышлығында 2023 йылдан алып уҙғарыла. Ошо ваҡыт эсендә проект төбәктең төп мәҙәни ваҡиғаларының береһенә әүерелде һәм федераль танылыу алды.

III «Китап байрамы» халыҡ-ара китап йәрминкәһенә өс көндә 184 мең кеше килде. 14 спектакль, художество-музыкаль тамаша, концерт күрһәтелде. Шағирҙар һәм яҙыусылар менән 120-нән ашыу осрашыу уҙғарылған, 27 тематик һәм интерактив майҙансыҡ эшләгән, МХО яугирҙәренә 1000-гә яҡын хат һәм открытка яҙылған. Былтыр йәрминкәлә Рәсәйҙең 22 төбәгенән һәм 4 сит илдән: Белорусь, Иран, Ҡаҙағстан, Ҡырғыҙстандан йәмғеһе 270 нәшриәт һәм китап һатыу ойошмаһы вәкилдәре ҡатнашты.

Фото: «Китап байрамы» халыҡ-ара китап йәрминкәһенең матбуғат хеҙмәте.