Салауат районындағы милли батыр музейына реставрация эшләнәсәк

"Донъяла Салауат Юлаев тураһында ишетмәгән, белмәгәндәр аҙҙыр. Тулы яҙмышын өйрәнмәһәләр ҙә, уны хоккей командаһы, Салауат ҡалаһы, ә бөгөн Салауат Юлаев батальоны, республика гербы аша таныйҙар. Кем һуң ул беҙҙең өсөн Салауат Юлаев? Шәхсән минең өсөн – Салауат Юлаев башҡорттарҙың бер нисә быуынын тәрбиәләгән милли геройы.

Әйтергә кәрәк, Радий Фәрит улы Хәбиров халыҡ хәтерендә милли батырыбыҙҙың иҫтәлеген һаҡлау мәсьәләләренә айырыуса яуаплылыҡ менән ҡарай. Салауат Юлаевтың тыуыуына 270 йыл тулыуға арналған "Салауат йыйыны" республика байрамына әҙерлек барышында коллегалар менән йәнә милли батырыбыҙҙың музейында булыу бәхете тейҙе. Залдарҙы, бүлмәләрҙе ҡарап сыҡҡандан һуң, бинаға ремонт талап ителеүен аңланыҡ. Бөгөн беҙҙең команда тырышлығы менән музей федераль реставрация программаһына индерелде һәм финанслау аласаҡ. Өс йылға иҫәпләнгән проектты быйыл башларға ниәтләйбеҙ," – тип белдерҙе "Бәйләнештә" селтәрендәге сәхифәһендә Урал Килсенбаев.

Беренсе вице-премьер әйтеүенсә, республиканың мәҙәниәт министры Әминә Шафиҡова, БР Милли музейы директоры Рөстәм Исхаҡов һәм тарихсы Рәмил Рәхимов менән яңыртыласаҡ музей экспозицияһы концепцияһын ҡарағандар. Уны хәтер урыны ғына түгел, киләсәк быуындар өсөн илһам сығанағы итеү теләге лә бар.

"Дуҫтар, беҙ музейҙы үҫтереү буйынса һеҙҙең фекерҙәрегеҙҙе һәм тәҡдимдәрегеҙҙе көтәбеҙ һәм бөтәһен дә был мөһим проектта әүҙем ҡатнашырға саҡырабыҙ! Бергәләп милли геройыбыҙҙың һоҡланырлыҡ яҙмышы тураһында мәғлүмәттәрҙе киләсәк быуындарға еткерәйек!" – тине Урал Таһир улы.

Фото: Урал Килсенбаевтың социаль селтәрҙәге сәхифәһенән.