Салауат районында Халыҡтар берҙәмлеге көнөнә байрам тантанаһы үтте

Салауат районы хакимиәте башлығы Марс Кашапов, район Советы рәйесе Ринат Әбдрәшитов халыҡты байрам менән ҡотланы.

– Рәсәй көсө – халыҡтар берҙәмлегендә, тиҙәр. Бөгөнгө шарттарҙа был байрам айырыуса әһәмиәткә эйә булды. Халыҡтар берҙәмлеге, тарихи хәтер, үҙ илеңә ышаныс, уның лайыҡлы киләсәге – бына шулар менән беҙ көслө. Хәҙер беҙҙең тупланыуыбыҙ бик мөһим. Райондың төрлө һөнәр һәм төрлө йәштәге кешеләре яугирҙәребеҙгә ярҙам итеү өсөн берләште. Беҙ бөгөн махсус хәрби операцияла ҡатнашҡан ир-егеттәребеҙгә даими гуманитар ярҙам күрһәтәбеҙ. Хөрмәтле салауаттар, һеҙгә шәфҡәтлелек һәм изге йөрәгегеҙ өсөн рәхмәт белдерәм. Беҙ бергә бумағанда ғына, барыһын да булдыра алабыҙ, – тине ҡотлау телмәрендә хакимиәт башлығы Марс Фәррәх улы.

Байрам сиктәрендә дәүләт, Башҡортостан Хөкүмәте, БР Дәүләт Йыйылышы – Ҡоролтай, республика министрлыҡтары, район Хакимиәте һәм Советы наградалары менән бүләкләү тантанаһы үтте. Башҡортостан Республикаһы Хөкүмәтенең Рәхмәт хатына күп йыллыҡ намыҫлы хеҙмәттәре өсөн Малаяҙ үҙәк район дауаханаһының участка шәфҡәт туташы Ғарифуллина Лидия Михайловна, Мөрсәлим ауылынан шәхси эшҡыуар Мөлөков Вадим Нәғим улы лайыҡ булды.

БР Дәүләт Йыйылышы – Ҡоролтай Рәйесенең Рәхмәт хаты “Граждандар йәмғиәте институттарын үҫтереүгә ҙур өлөш индергәне һәм әүҙем йәмәғәт эшмәкәрлеге өсөн” – Салауат районы инвалидтар йәмғиәтенең һаулыҡ мөмкинлектәре сикләнгән кешеләр менән эшләү белгесе, район башҡорттары ҡоролтайы рәйесе Вахитова Нәфисә Ғафир ҡыҙына, “Намыҫлы хеҙмәт һәм әүҙем йәмәғәт эшмәкәрлеге өсөн” – Салауат районының һуғыш һәм хеҙмәт ветерандары советы рәйесе Ғәлиева Көнһылыу Ҡазихан ҡыҙына, “Махсус хәрби операцияла ҡатнашыусыларға һәм мобилизацияланыусыларға ярҙам күрһәтеүҙе ойоштороуға ҙур өлөш индергәне өсөн” райондың “Ғаилә” үҙәге белгесе, “Малаяҙ беҙҙекеләр өсөн” маскировка селтәрҙәрен үреү буйынса йәмәғәт ойошмаһын ойоштороусы Бәширова Гөлнур Нәфис ҡыҙына тапшырылды.

Шәрип төп мәктәбенең математика һәм физика уҡытыусыһы Ғәлина Рәсүҙә Ҡотоп ҡыҙына “Башҡортостан Республикаһының атҡаҙанған уҡытыусыһы” маҡтаулы исеме бирелде. БР Мәғариф һәм фән министрлығының Почет грамотаһы менән Янғантау урта мәктәбенең рус теле һәм әҙәбиәте уҡытыусыһы Закирова Эльмира Ралиф ҡыҙы бүләкләнде.

Башҡорт халҡының милли батыры Салауат Юлаевтың тыуыуына 270 йыл тулыуға арналған “Салауат йыйыны” республика фольклор байрамын ойоштороуҙа һәм үткәреүҙә әүҙем ҡатнашҡандары өсөн Лағыр мәҙәниәт йорто мөдире Яныбаева Рәүиә Фәруҡ ҡыҙы, Торналы күп функциялы ауыл клубы мөдире Садиҡова Винера Миңлеғәлим ҡыҙы, Малаяҙ ауылының Балалар сәнғәт мәктәбе уҡытыусыһы Ханов Радик Рәйес улы, полиция генерал-лейтенанты А.Ф. Әхмәтханов исемендәге Торналы урта мәктәбе уҡыусылары Аделина Рахманғолова, Амелия Ямалова БР Мәҙәниәт министрлығының Рәхмәт хаты менән дәртләндерелде.

БР Йәмәғәт палатаһының “Атай даны” йәмәғәт наградаһының “Яҡындарыңдың һөйөүе һәм ярҙамы, лайыҡлы атайлыҡ өлгөһө өсөн” номинанты Дипломы “Бөтә Рәсәй инвалидтар йәмғиәте” дөйөм Рәсәй йәмәғәт ойошмаһының республика ойошмаһының Салауат районы ойошмаһы рәйесе Вахитов Миннислам Миңлеәхмәт улына тапшырылды.

Махсус хәрби операцияла ҡатнашыусыларға ярҙам күрһәтеүҙе ойоштороуға ҙур өлөш индергәндәре өсөн Салауат районы Хакимиәтенең Почет грамотаһы менән райондың хәрби хәрәкәттәр ветерандары союзы рәйесе Хөснуллин Рөстәм Нәбиулла улы, шәхси эшҡыуар Ғибәҙәтов Айҙар Данияр улы бүләкләнде. Уларға хакимиәт башлығы Марс Кашапов "Салауат районы алдындағы ҡаҙаныштары өсөн" иҫтәлекле билдәһен дә тапшырҙы.

Дыуан, Мәсетле һәм Салауат райондары хәрби комиссары урынбаҫары Марат Рәхимов махсус хәрби операцияла батырҙарса һәләк булған ир-егеттәрҙең балаларына һәм ҡатындарына Батырлыҡ ордены тапшырҙы.

Тантана “Беҙ бергә” тип аталған бай йөкмәткеле байрам концерты менән тамамланды.