Өфөлә «Туғанлыҡ» милли театрҙар фестивале уҙа

«Туғанлыҡ» - тарихи һәм мәҙәни-тел берлегенә нигеҙләнгән юғары театр мәҙәниәтен, дуҫлығын һәм яҡшы күршеләрсә мөнәсәбәттәрҙе һаҡлаған республикаларҙың һәм төрки донъяһы илдәренең сәхнә сәнғәте сағыу байрамы. Ул Башҡортостандың Мәҙәниәт министрлығы башланғысы менән 1991 йылдан уҙғарыла. Быға тиклем Төрки телле театрҙар фестивале тип аталған форум быйыл Милли театрҙар фестивале тип аталды, сөнки уның форматы киңәйә.

Фестиваль афишаһында 14 спектакль, уларҙың икәүһе - конкурстан тыш: Мәжит Ғафури исемендәге Башҡорт академия драма театры һәм А.С.Пушкин исемендәге Псков драма театры (Рәсәй Милли драма театры филиалы - Александрин театры) спектаклдәре. Конкурс программаһында - Татарстан, Ҡаҙағстан, Ҡырғыҙстан, Төньяҡ Осетия-Алания, Сыуашстан, Ҡалмыҡстан, Абхазия, Тыва, Дағстан, Мари Иле театр коллективтарының спектаклдәре.

Фестиваль сиктәрендә Рәсәйҙең Милли театрҙар ассоциацияһы ярҙамында Рәсәйҙең Милли драма театрынан (Александра театры) белем биреү программаһы ҡаралған. Шулай уҡ киске актерҙар клубтары, Өфөнөң иҫтәлекле урындары буйлап экскурсиялар, билдәле театр эшмәкәрҙәре менән осрашыуҙар ойоштороласаҡ. Спектаклдәр М.Ғафури исемендәге Башҡорт драма театры, Өфө «Нур» татар дәүләт театры, М.Кәрим исемендәге Милли йәштәр театры сәхнәләрендә ҡуйыла. «Туғанлыҡ»ты Мәжит Ғафури исемендәге Башҡорт академия драма театрының «Ҡыҙыл паша» (Н. Асанбаев, реж. А. Абушахманов) спектакле аса, тип хәбәр итә "Республика Башкортостан" гәзите.

Абруйлы ҡунаҡтар сифатында Рәсәйҙең Театр эшмәкәрҙәре союзы рәйесе, Олег Табаковтың Мәскәү театрының художество етәксеһе Владимир Машков, Рәсәйҙең халыҡ артисы, Милли драма театрының (Александра театры) художество етәксеһе, Милли театрҙар ассоциацияһы советы рәйесе Валерий Фокин, М.Горький исемендәге Ырымбур дәүләт өлкә драма театрының художество етәксеһе, Ырымбур дәүләт сәнғәт институты профессоры, Рәсәйҙең халыҡ артисы Рифҡәт Исрафилов саҡырылған.

Фото: Башҡорт опера театрының матбуғат хеҙмәте.