Быйыл да бергәләп башҡортса диктант яҙасаҡбыҙ!

11.00 сәғәттә (Өфө ваҡыты буйынса) Башҡортостан юлдаш телевидениеһы, “Бәйләнештә” социаль селтәрендә, Телеграм-каналда диктант тексын тура эфирҙа уҡый башлайҙар:

- 11.00-11.25 сәғәт арауығында – башҡорт телен яңы өйрәнә башлаған ҡатнашыусылар өсөн;

- 11.30-12.00 сәғәттә – башҡорт телендә иркен аралашҡан ҡатнашыусылар өсөн;

- 12.05-12.30 сәғәт арауығында – башҡорт теленең төньяҡ-көнбайыш диалектында яҙған ҡатнашыусылар өсөн.

Быйыл башҡорт телендә иркен аралашҡан кешеләр өсөн тексты Башҡортостан Башлығы Хакимиәте етәксеһенең эске сәйәсәт буйынса беренсе урынбаҫары Урал Таһир улы Килсенбаев уҡый. Башҡорт телен яңы өйрәнә башлағандар өсөн – “Башҡорт теле һәм әҙәбиәте йыл уҡытыусыһы” төбәк-ара конкурсы еңеүсеһе Мирас Рәшит улы Ишдәүләтов. Башҡорт теленең төньяҡ-көнбайыш диалектында яҙған ҡатнашыусылар М. Гәрәев исемендәге башҡорт тарихи-мәҙәни үҙәгенең баш белгесе Гүзәл Рәсим ҡыҙы Нуриева етәкселегендә диктант яҙасаҡ.  

Һәр ҡатнашыусының диктантты өйҙә үҙаллы яҙыу мөмкинлеге бар. Тамамлағас, диктант яҙылған ҡағыҙҙы фотоға төшөрөп (сканер аша үткәреп), 2022 йылдың 24 апреленең төнгө 23.59 сәғәтенә тиклем [email protected] электрон почтаһына йәки телеграм-ботҡа https://t.me/bash_dictant_bot ебәрергә кәрәк.

Диктантты онлайн режимда яҙыу мөмкинлеге булмаған осраҡта, тура эфирҙың видеояҙмаһын рәсми сайтта 2022 йылдың 24 апреленең 23.59 сәғәтенә тиклем (Өфө ваҡыты буйынса) ҡарарға мөмкин. Теләге булғандар эфирҙың ҡабатланыуын ҡарап та яҙа ала.

Төп оффлайн майҙансыҡтар Башҡорт дәүләт университетында, М. Аҡмулла исемендәге Башҡорт дәүләт педагогия университетында, Башҡортостан Республикаһының Мәғарифты үҫтереү институтында һәм Башҡортостан Республикаһының Милли музейында ойошторола.

Өҫтәмә оффлайн майҙансыҡтар исемлеген сайтта https://bashdictant.ru/  ҡарарға мөмкин. Шулай уҡ сайтта оффлайн майҙансыҡтарҙы теркәү мөмкинлеге барлыҡҡа килде. Теркәлгәндән һуң улар “Бөтә майҙансыҡтар” бүлегендә сағылыш табасаҡ.

Ойоштороусылар башҡорт теленән халыҡ-ара диктантта ҡатнашыусыларҙың барыһын да акция барышында төшкән фотоһүрәттәрҙе социаль селтәргә һалырға һәм #БашДиктант2022 #башҡорттелендәдиктант хештегтарын ҡуйырға һорай.

 Фото: rb-str.ru һәм А.Нурмөхәмәтов фотолары.