– Йыл һайын беҙҙең мәктәп уҡыусыларыбыҙ Бөтә Рәсәй олимпиадаһында үҙҙәренең ҙур еңеүҙәре менән ҡыуандыра, – тигән Радий Хәбиров. – 2019 йылда призер дипломдары һәм еңеүҙәр буйынса республика ил кимәлендә 35-се урында ине. 2020 йылда йомғаҡ яһалманы. Ә бына 2021 йылда Башҡортостан – 16-сы урынға, ә 2022 йылда 10-сы урынға күтәрелде. Бик шәп һөҙөмтә! Уҡыусыларҙы ла, уҡытыусыларҙы ла ихлас ҡотлайым!
Радий Хәбиров һөйләүенсә, бындай алдынғы уҡыусылар юғары уҡыу йорттарына имтиханһыҙ ҡабул ителә. Үҙ сиратында, Башҡортостан шулай уҡ талантлы мәктәп уҡыусыларын һәм уҡытыусыларҙы ярҙамынан өҙмәй. Республикабыҙҙа бик күп дәртләндереү саралары күрелгән. Мәҫәлән, Бөтә Рәсәй олимпиадаһының һуңғы этабында еңеү яулағандарға 100 мең һум бирелә, ә призерҙарға 60 мең һум түләнә. Бынан тыш йыл да 100 уҡыусы Башҡортостан Башлығы стипендияһын ала, улар ай һайын өс мең һум аҡса ала.
Фото: “Бәйләнештә” селтәренән.