- Ете һәм өс йәшлек балаларҙың әсәһе булараҡ күҙәтеүҙәрем менән бүлешәм. Өс йәшкә тиклемле балаға туған телен белеү өсөн яҡын- тирәләге мөхит тә, йәғни ата- әсәләре менән аралашыу ҙа етә. Минең улым өс йәшкә тиклем фәҡәт башҡорт телендә һөйләште. Һуңынан ул икенсе мөхиткә барып эләкте.. Ҡыҫҡаһы, баланың аралашы даирәһе киңәйгән һайын, ул әсә теленән ситләшә, башҡа телдәрҙе үҙләштерә, русса һөйләшкән тиҫтерҙәре менән дә шул телдә аралаша башлай. Заман ритмына яраҡлашҡан, эштән бушамаған ата- әсәнең балаһы менән үҙ телендә төплө аралашырға ваҡыты ла, көсө лә ҡалмай. Ләкин, Мәскәүҙә йәшәһәләр ҙә балаларын ике телле, рухлы итеп үҫтергән ата- әсәләр ҙә бар. Ысынлап та, сит ерҙә башҡорт моңона, мәҙәниәтенә, йәнле аралашыуға һыуһау кеүек күренеш хас, шуға ла беҙ, Башҡортостандан ситтә йәшәүсе башҡорттар, был мәсьәләгә айырыуса етди ҡарайбыҙ.