«Ҡурай даны» икенсе милли телепремияһы тапшырыла

Награда үҙ эшенең оҫталарына, һөнәрселәргә, аграрийҙарға, эшҡыуарҙарға, ижади лидерҙарға, шулай уҡ теге йәки был өлкәлә уңышҡа өлгәшкән ғаиләләргә тапшырыла.

2020–2021 йылдарҙа телепремияға 45 ҡатнашыусы — «Ҡурай» телеканалы тамашасылары тәҡдим иткән замандаштарыбыҙ күрһәтелгән. Был юлы «Ҡурай даны» икенсе милли телепремияһы 9 номинацияла уҙғарыла:

«Ер кешеһе»,

«Һөнәр оҫтаһы»,

«Эшлекле ханым»,

«Ҡул оҫтаһы»,

«Ижади ғаилә»,

«Миһырбанлы ғаилә»,

«Спорт ғаиләһе»,

«Йыл тренеры»,

«Йыл режиссеры».

Премияның төп принцибы — еңеүселәрҙе объектив һайлап алыу. 2020-2021 йылдарҙа «Ҡурай» телеканалында тамашасыларҙы номинанттарҙың һәр береһе менән таныштырған тапшырыуҙар эфирға сыға. «Ҡурай даны» көмөш миҙалы хужаларын телетамашасылар һайлай — еңеүселәр интернетта тауыш биреү юлы менән билдәләнә.

«Ҡурай даны» милли телепремияһы 2018 йылда «Ҡурай-ТВ» йыр-моң телеканалы башланғысы менән булдырылды. Төп маҡсаты — үҙ эшендә уңышҡа өлгәшкән замандаштарыбыҙҙы асыҡлау һәм башҡаларға танытыу, шулай уҡ башҡорт телен, үҙенсәлекле һәм хәҙерге мәҙәниәтте пропагандалау, һаҡлау һәм популярлаштырыу, халыҡ традицияларын, һөнәрҙәрен үҫтереү.