Өфө фән һәм технологиялар университетында Мөхәмәт Харрасов исемендәге зал асылды

Өфө фән һәм технологиялар университетының физика-техник институты директоры вазифаһын башҡарыусы Эльдар Ҡанафин 2000-2010 йылдарҙа Башҡорт дәүләт университетына етәкселек иткән профессорҙы хөрмәтләп иҫкә алырға килгәндәрҙең барыһын да сәләмләне.

- Университетыбыҙҙың ҙур физик аудиторияһы Хәҙер Мөхәмәт Хәҙис улы исемен йөрөтәсәк, - тине Илдар Ҡанафин. - Уның етәкселеге аҫтында ун йыл дауамында университет Рәсәй вуздары араһында алдынғы позицияларҙы биләне.

Өфө фән һәм технологиялар университеты ректоры профессор Вадим Захаров Мөхәмәт Харрасовтың студенттан ректорға тиклем юл үтеүен билдәләне.

- Ул фән, белем һәм үҫеп килеүсе быуынды тәрбиәләүҙең нимә икәнен бик яҡшы белә ине. Тулыһынса белем биреү процесына сумғайны, - тип билдәләне Вадим Захаров. - Бөгөн бында, аудиторияла, уның уҡыусылары ла, ул ярҙам иткән кешеләр ҙә бик күп.

Университет етәксеһе билдәләүенсә, Мөхәмәт Хәҙис улының бөтә белем биреү һәм ғилми карьераһы Мәскәү дәүләт университеты менән тығыҙ бәйләнгән була, унан Башҡортостандың классик белем биреүенә күп өлөш индерә.

Күптән түгел УУНиТ ғилми советы Мөхәмәт Харрасовтың исемле стипендияһын булдырҙы, ул студенттарға әүҙем ғилми эш һәм уҡыу эшмәкәрлегенә йәлеп итеү өсөн биреләсәк. Тантаналы сара сиктәрендә тәүге исемле стипендияны Өфө фән һәм технологиялар университетының физика-техник институты магистранты Анжела Сәмиғуллина алды, тип хәбәр итә "Молодежная газета" баҫмаһы.

БР Дәүләт Йыйылышы - Ҡоролтай депутаты Айбулат Хажин ғалим-физиктың республиканың мәғариф системаһы буйынса закондар сығарыуға индергән өлөшө һәм уның һәр студент менән уртаҡ тел таба белеүе хаҡында һөйләне. Ҡасандыр үҙе Башҡорт дәүләт университетын тамамлаған БР Яҙыусылар союзы рәйесе Айгиз Баймөхәмәтов Мөхәмәт Хәҙис улы тураһында хәтирәләре менән уртаҡлашты. Өфө фән һәм технологиялар университетының ғилми эштәр буйынса проректоры, профессор Илдус Шәрәфуллин Мөхәмәт Хәҙис улы тураһында уның ижтимағи-сәйәси, ғилми эшмәкәрлегенең иң сағыу мәлдәренә презентация әҙерләгәйне. Профессор тураһында йылы хәтирәләре менән уның студенттары, коллегалары һәм дуҫтары ла уртаҡлашты.

Фото: "Молодежная газета".