Башҡортостан урмандарында махсус режим ғәмәлдә – штрафтар 2 млн. һумға тиклем

“Молодежная газета” баҫмаһы хәбәр итеүенсә, 8 апрелдән Башҡортостанда рәсми рәүештә янғын йәһәтенән хәүефле миҙгел башланды. Статистика күрһәтеүенсә, байрамдарҙа бөтә урман янғындарына ла тиерлек ут менән һаҡһыҙ эш иткән кешеләр ғәйепле.

Урманда нимә эшләргә ярамай:

- усаҡ яғырға;

- шырпы, тәмәке төпсөктәрен йәки эҫе көлдө ташларға;

- быяла шешәләр һәм ярсыҡтар ҡалдырырға (ҡояшта улар линза кеүек эшләй һәм үләнде яндыра ала);

- майлы сепрәктәрҙе ташларға;

- аҡландарҙа һәм урман янындағы баҫыуҙарҙа ҡоро үләнде яндырырға;

- ағастар төбөндә, йәш ылыҫлы ағастарҙа, ҡоро үләндә йәки ҡоро-һарыла ут тоҡандырырға.

Штрафтар ҙур:

- граждандар өсөн – 60 000 һумға тиклем;

- вазифалы кешеләр өсөн – 110 000 һумға тиклем;

- компаниялар һәм предприятиелар өсөн – 2 000 000 һумға тиклем.

Әгәр янғын урманға етди зыян килтерһә, ғәйеплене енәйәт яуаплылығына тарттырыуҙары ихтимал.

Урманда ут күрһәгеҙ, шунда уҡ шылтыратығыҙ:

8 (347) 218-14-14 – Башҡортостан Урман хужалығы министрлығының диспетчер хеҙмәте;

8 (800) 100-94-00 – федераль урман һағы (шылтыратыу бушлай).

Министрлыҡта әйтеүҙәренсә, урман янғынын һүндереүгә ҡарағанда иҫкәртеүе еңелерәк.

Фото: “Молодежная газета”.