Һаулыҡҡа зыян килтереү осрағы буйынса полицияға ғариза менән мөрәжәғәт итегеҙ. Эт тешләү осрағы буйынса ғаризаны ҡарау һөҙөмтәләрен (енәйәт эшен ҡуҙғатыу йәки енәйәт эше асыуҙан баш тартыу тураһында ҡарар, эт хужаһын административ яуаплылыҡҡа тарттырыу тураһында ҡарар) алығыҙ.
Эт хужаһынан һеҙ һаулыҡҡа һәм мөлкәткә килтерелгән зыянды, шулай уҡ әхлаҡи зыянды ҡаплауҙы талап итергә хоҡуҡлыһығыҙ.
Әгәр берәҙәк эт булһа, талаптарҙы урындағы үҙидара органдарына ҡуйырға кәрәк, сөнки уларға муниципаль берәмек биләмәһендә хужаһыҙ хайуандарҙы тотоу һәм аҫырау буйынса саралар үткәреүҙе ойоштороу бурысы йөкмәтелгән.
Тән йәрәхәтләнгәндә йәки һаулығына башҡа төрлө зыян килгәндә ҡаза күреүселәрҙең эш хаҡынан (табышынан) сығымы, шулай уҡ һаулығына зыян килтереү менән бәйле (дауаланыу, өҫтәмә туҡланыу, дарыуҙар һатып алыу, сит кешеләрҙең тәрбиәләүе, шифахана-курорт дауаланыуы һ.б.) сығымдары ҡапланырға тейеш.
Мөлкәткә килтерелгән зыянды баһалағанда зыян күргән әйберҙәрҙең хаҡы ла иҫәпкә алыныуы мөмкин. Сығымдарығыҙҙы раҫлаған документтар йыйығыҙ.
Эт хужаһына йәки урындағы хакимиәткә (берәҙәк эт булһа) үҙ ирке менән зыянды ҡаплау талабы менән судҡа тиклемге дәғүә менән мөрәжәғәт итегеҙ. Талаптарҙы ҡәнәғәтләндереүҙән улар баш тартҡан осраҡта, һеҙҙең судҡа мөрәжәғәт итергә хоҡуғығыҙ бар.
Тимур Имашев,
район прокуроры ярҙамсыһы.