Өфөлә "Рәсәй Zа Самбо" форумының пленар ултырышы үтте

"Берҙәм Рәсәй" партияһының Генераль советы секретары вәкәләттәрен ваҡытлыса башҡарыусы, Федерация Советы рәйесенең беренсе урынбаҫары Владимир Якушев форумда ҡатнашыусыларҙы Бөтә Рәсәй самбо көнө менән ҡотланы һәм форумға әҙерлек буйынса ойоштороу эшен юғары баһаланы. Ул Рәсәй мәктәптәрендә самбо дәрестәрен индереү буйынса пилот проектын иғлан итте һәм 2025 йылда ил төбәктәрендә Бөйөк Ватан һуғышында Еңеүҙең 80 йыллығына арналған самбо буйынса турнирҙар ойошторорға тәҡдим итте, тип яҙа "Республика Башкортостан" гәзите.

- Форум республикабыҙҙа самбоны үҫтереүгә етди этәргес бирер, тип ышанам. Бөгөн Өфө "Рәсәй Zа Самбо" форумы сиктәрендә ҡабул иткән "Zвезда" турниры - беҙҙең яңы Көрәш һарайында үткән тәүге ҙур ярыш булыуы ҡыуаныслы. Спорт инфраструктураһын үҫтереү беҙҙең милли идеябыҙ булырға тейеш. "Берҙәм Рәсәй" партияһының был эште әүҙем яҡлауы мөһим, - тине Башҡортостан Башлығы Радий Хәбиров.

Алтай республикаһы башлығы, төбәк хөкүмәте рәйесе Андрей Турчак Башҡортостанда спортты үҫтереүгә ҙур иғтибар бүленеүен билдәләне. Бөтә Рәсәй самбо көнө менән форумда ҡатнашыусыларҙы Донецк Халыҡ Республикаһы башлығы Денис Пушилин да ҡотланы. Ул үҫеп килеүсе быуын ҡиммәттәре системаһын булдырыуҙа спорт көрәшенең ролен юғары баһаланы. Бөтә Рәсәй самбо федерацияһы президенты Сергей Елисеев форумдың түңәрәк өҫтәлдәре эшенең һөҙөмтәләре тураһында һөйләне.

Эшкә йомғаҡ яһап, Владимир Якушев Өфөләге майҙансыҡта яңғыраған тәҡдимдәрҙең һәм ҡабул ителгән ҡарарҙарҙың ил төбәктәрендә самбоны үҫтереү буйынса артабанғы эштең нигеҙе буласағын билдәләне.

Фото: Башҡортостан Башлығы сайты.