Мәсетле районында "Журналистика оҫтаханаһы" семинары үтте

Семинарҙа журналистар эшмәкәрлегенең мөһим мәсьәләләрен тикшерҙеләр, сайттарҙы һәм социаль селтәрҙәрҙе нисек яҡшыраҡ алып барырға, көнүҙәк темаларҙы яҡтыртырға өйрәттеләр, тип хәбәр итә "Мәсетле тормошо" гәзите.

"Башҡортостан Республикаһы" нәшриәт йорто генераль директоры вазифаһын башҡарыусы Рәсүл Сәфәрғәлиев әйтеүенсә, "Журналистика оҫтаханаһы: сайт, социаль селтәрҙәр һәм принт" проекты Башҡортостан Башлығы гранттары фонды булышлығында тормошҡа ашырыла. Алынған аҡсаға гәзит редакциялары өсөн төрлө ҡорамалдар һатып алынған.

- Баҫма киң мәғлүмәт саралары - хәҙерге заман уҡыусыһы ышанып уҡыған киң мәғлүмәт сараларының бер төрө. Әлбиттә, был өлкәлә проблемалар ҙа бар, уларҙы хәл итеү өҫтөндә эшләйбеҙ. Шуларҙың береһе - почта эшләмәгән ауылдарға гәзиттәр ташыу, - тип билдәләне ул.

"Башҡортостан Республикаһы" нәшриәт йортоноң ваҡытлы матбуғат таратыу бүлеге начальнигы Айнар Байбулатов нәшриәт йортоноң йыл һайын ойошторолоусы "Изге яҙылыу" акцияһы хаҡында һөйләне, уның сиктәрендә теләгән һәр кем махсус хәрби операцияла ҡатнашыусының ғаиләһенә, күп балалы ғаиләләргә һәм башҡаларға республика, район гәзиттәренә яҙыла ала.

Төньяҡ-көнсығыш район-ара ижади берекмәһе рәйесе Сөмбөл Исмәғилева тираждың кәмеүе һәм кадрҙарҙың етешмәүе кеүек проблемалар хаҡында һөйләне. Әммә шул уҡ ваҡытта төньяҡ-көнсығыш мәғлүмәт үҙәктәре журналистары райондарҙың социаль тормошонда әүҙем ҡатнашыуын дауам итә.

Семинар барышында шулай уҡ журналистарҙы бүләкләү тантанаһы ла үтте.

Фото: "Мәсетле тормошо".