Башҡортостанда “Рәхмәт” акцияһы үтәсәк

18, 19 һәм 20 сентябрҙә Башҡортостанда “Рәхмәт – 2026” акцияһы уҙа. Һайлау участкаларына килеүселәр ирекмәндәрҙән махсус купондар алып, уларҙы акция партнерҙарынан ташламаларға алмаштыра ала, атап әйткәндә, магазиндарҙа, кафеларҙа, салондарҙа һәм башҡаларҙа. Әммә быйыл ойоштороусылар, үткән йылдарҙағы кеүек, ҙур бүләктәр уйнатмай, купонға ташламалар ғына буласаҡ.

Башҡортостандың “Алға-патриот” спорт-патриотик үҙәге директоры Ринат Хәбиров аңлатыуынса, тауыш биреүселәр QR-кодлы флаерҙар аласаҡ, уларҙы магазиндарҙа, бөҙрәханаларҙа, автосервистарҙа һәм башҡа урындарҙа ҡулланырға мөмкин. Партнерҙарҙың тулы исемлеге көн һайын рахмат2026.рф сайтында яңыртыла. Әлеге акцияның алдағыларынан төп айырмаһы – тик купондан ғына тора.

“Беҙ QR-кодлы купондар таратасаҡбыҙ, әммә серия номерҙары юҡ. Беҙгә был купонды кемдең аласағы билдәһеҙ, ирекмән уны тауыш биреүсегә генә бирәсәк”, – тине спикер “Молодежная газета” баҫмаһына.

Ул шулай уҡ мөһим мәлде билдәләне: граждандарҙан ташлама алыу өсөн бер ниндәй ҙә шәхси мәғлүмәттәр талап ителмәйәсәк. Был кешеләрҙе мутлашыусыларҙан һаҡлауҙан тыш, флаерҙарҙы етештереүҙә экономияларға ла мөмкинлек бирә.

Ни өсөн быйыл күләмле уйындар булмаясаҡ, тигән һорауға яуап биреп, ул быны еңел булмаған ваҡыт һәм бизнесты фронтҡа ярҙамға йүнәлтеү менән аңлатты. Уның һүҙҙәренсә, эшҡыуарҙар махсус хәрби операцияла ҡатнашыусылар өсөн гуманитар конвойҙар йыйып, ҙур социаль йөкләмә үтәй.

“Хәҙер йәмғиәттең төп бурысы – “Барыһы ла Еңеү өсөн!”. Шуға күрә “Рәхмәт” акцияһы ташламаларға йүнәлтелгән”, – тип һыҙыҡ өҫтөнә алды Ринат Хәбиров.

Ул, ҡиммәтле бүләктәргә бюджет һәм шәхси аҡсаларҙы тотоноу хәҙер урынһыҙ, тип өҫтәне. Ил һәм республика еңеүгә өлгәшеү һәм яугирҙәребеҙҙе тиҙ арала өйҙәренә ҡайтарыу өсөн бөтә көсөн һала, унан һуң тупланған тыныс тормош проблемаларын хәл итергә тура киләсәк.

Ойоштороусылар әйтеүенсә, купондар һаны сикләнгән, шуға күрә республика халҡына һайлау участкаһына барыуҙы кисектермәҫкә кәңәш итәләр. Акция 18, 19 һәм 20 сентябрҙә үтә.

Фото: “Молодежная газета”.