Оло йәштәге яңғыҙҙар һәм инвалидтар өсөн ғаилә

Финиза (исеме үҙгәртелде) өләсәй сығышы менән Ҡыйғы районынан. Кейәүгә сыҡҡас, Салауат районына күсеп килә һәм шунда төпләнә. Ире менән никахта уның биш балаһы тыуа. Хәҙер, балалары үҫеп, үҙ аллы йәшәйҙәр. Үҙе тол ҡалғас, Финиза өләсәй, инвалид ирҙе тәрбиәгә алырға ҡарар итә.

Сығышы менән Салауат районынан булған Регат ғаилә ҡороп, ҡатыны һәм ике балаһы менән Эҫем ҡалаһында йәшәй. Айырылышҡас, ул торлаҡһыҙ тороп ҡала. Ҡыҙғанысҡа ҡаршы, ул ике өлкән балаһы менән аралашмай. Ир күҙ буйынса беренсе төркөм инвалиды.

Финиза өләсәй Регатты оҙаҡ йылдар белә. Ир йәшерәк саҡта йыш ҡына уларға ҡунаҡҡа килеп йөрөгән, хужалыҡта ярҙам иткән булған. Регаттың күреү һәләте буйынса проблемалары тураһында белгәс, Финиза өләсәй, йәлләп, уға үҙе янында ҡалырға тәҡдим итә. Улар ғаилә ҡороу мөмкинлеге тураһында белеп ҡалып, беҙгә мөрәжәғәт итте. Шулай итеп, беҙ уларға ярҙам итеп, оло кешене тәрбиәгә алған ғаилә булдырҙыҡ.

Илдә халыҡтың ҡартайыуы оло йәштәгеләргә социаль ярҙам күрһәтеүҙе әһәмиәтлерәк итә. Өлкән быуындың именлеге тураһында хәстәрлек күреү йәмғиәт һәм социаль хеҙмәттәр өсөн өҫтөнлөклө бурысҡа әйләнә бара. Дәүләттең төрлө яңы алымдар индереүенә ҡарамаҫтан, күп кенә оло йәштәге кешеләр яңғыҙ ҡала һәм даими тәрбиәгә мохтаж. Шуға бәйле, ярҙамға мохтаж оло йәштәгеләрҙең тормошон ойоштороуҙың яңы формаларын эҙләү бик мөһим. Ыңғай ҡарарҙарҙың береһе – оло кешеләрҙе тәрбиәгә алған ғаиләләр булдырыу, улар оло йәштәгеләргә уңайлы һәм ғәҙәти өй мөхитен тәьмин итеп, махсус учреждениеларҙа йәшәүгә алмаш була ала.

Тәрбиәгә алған ғаилә: оло йәштәгеләр һәм инвалидтар тураһында хәстәрлек күреүгә яңы ҡараш. Бындай ғаиләне булдырыу өсөн махсус килешеү нигеҙ булып тора. 65 йәштән өлкән йәштәге яңғыҙ, тулыһынса эшкә һәләтле кешеләр һәм инвалидтар ғаиләгә урынлаштырыла ала. Был кешеләр башҡаларҙың даими ярҙамына мохтаж, сөнки ауырыу сәбәпле, өлкән йәштә булыуы йәки инвалидлыҡ арҡаһында улар үҙ-үҙен хеҙмәтләндереү йәки хәрәкәт итеү кеүек төп ихтыяждарҙы үҙ аллы хәл итә алмай.

Башҡортостан Республикаһында даими йәшәгән, эшкә һәләтле Рәсәй граждандары өлкән йәштәге һәм инвалид граждандарҙы ғаиләгә алып ҡарай ала. Был кешеләр үҙҙәренең йортон һәм көнкүрешен тәрбиәгә алынғандар менән бүлешергә, уртаҡ хужалыҡ алып барырға һәм төп тормош ихтыяждарын ҡәнәғәтләндереүҙә ярҙам итергә әҙер.

Социологик тикшереүҙәр үткәрелгәндән һуң, эксперттар шундай һығымтаға килгән: ғаилә мөхитендә йәшәү оло йәштәгеләрҙең психологик торошона ыңғай йоғонто яһай.

Рита Мөхәмәтйәнова, Салауат районы буйынса социаль участковый.