Салауат районында 65 егет әрмегә алына

Салауат районынан яҙғы саҡырылышта 65 егет әрмегә оҙатыласаҡ. Бының хаҡта район Хакимиәтендә оператив кәңәшмәлә Дыуан, Мәсетле һәм Салауат райондары хәрби комиссариатының саҡырыу бүлексәһе начальнигының өлкән ярҙамсыһы Флорида Ханова хәбәр итте.

– Салауат районынан бөгөнгә  Рәсәй Ҡораллы көстәренә хеҙмәт итергә 41 егет оҙатылды. Иң күп призывниктар үткән шәмбе, 21 июндә, ебәрелде: 11 кеше китте. Бөтәһе апрелдән алып 12 тапҡыр оҙатыу булды. Тағы өсәү ҡалды: 1, 4 һәм 8 июлдә егеттәр әрмегә китәсәк. Яҙғы саҡырыу осоронда райондан бөтәһе 65 егет хеҙмәткә алынасаҡ, – тине Флорида Барый ҡыҙы.

Хәрби комиссариат вәкиле белдереүенсә, Салауат районы әрмегә саҡырыу буйынса планды һәр ваҡыт үтәп килә. Салауаттар Тыуған ил алдындағы мөҡәддәс бурысын намыҫлы үтәй.

Хәтерегеҙгә төшөрәбеҙ, 1 апрелдән илдә әрмегә саҡырыу осоро бара. Ул 15 июлгә тиклем дауам итә. Законға ярашлы, Рәсәй Ҡораллы көстәре сафына 18 йәштән 30 йәшкә тиклем егеттәр саҡырыла. Улар бер йыл хеҙмәт итә.