Аҡыллы кәңәштәрең менән беҙҙе һөйөндөрөп йәшә лә йәшә, әсәй!

Балалыҡ йылдары һәм үҫмер сағы һуғыш һәм һуғыштан һуңғы ваҡытҡа тура килгәс, ул да үҙенең тиҫтерҙәре һымаҡ ил өҫтөнә төшкән ауырлыҡтарҙы үткәрә. Бала саҡтан ата-әсәһенә, бер туған һеңле-ҡустыларына йорт эштәрендә ярҙам итә. Әсәһе менән колхоздың баҫыу эштәренә лә йөрөй. Атаһы ауырыуҙан һуң баҡыйлыҡҡа күскәндә иң кесе энеһе тыумаған була.

Бөтә ауырлыҡтарға ҡарамай, әсәйебеҙ белем алырға тырыша. 8-се класты бөткәс, ул ваҡыттағы трахома ауырыуы менән көрәшер өсөн әҙерләнгән медсестралар курсын тамамлай. Йәш ҡыҙҙы Яхъя ауылына эшкә ебәрәләр. Йөрөп эшләүе бик йыраҡ булғас (ул ваҡытта эшкә йөрөр өсөн ат йәки башҡа транспорт булмай), ул Йонос ауылына эшкә күсә. Был ауылда ул үҙенең тормош иптәше Мырҙаханды осрата. Йәштәр өйләнешеп, 4 ҡыҙға, 1 улға ғүмер бирәләр.

Нәфисә Хәлимулла ҡыҙы Йонос ауылында шәфҡәт туташы булып бер нисә йыл эшләй һәм, ауылда һатыусы булмау сәбәпле, магазинға эшкә урынлаша. Трактор арбаһына ултырып, Һилиә (Сулея) базаһынан аҙыҡ-түлек, көнкүреш кәрәк-яраҡтарын ташый.

Тормош иптәше йәшләй вафат булғас, балаларын уҡытырға тырыша. Бөтә балалары ла педагог һөнәрен һайлай. Улы ғына, бер нисә йыл мәктәптә эшләгәс, милицияға эшкә күсә һәм хаҡлы ялға сыҡҡансы унда хеҙмәт итә. Ҡыҙҙары районыбыҙҙың төрлө ауылдарында мәктәптә һәм балалар баҡсаһында эшләй. Өлкән ҡыҙы Нижневартовск ҡалаһында балалар баҡсаһында эшләп, маҡтаулы исемгә лайыҡ булып хаҡлы ялға сыға.

Нәфисә Хәлимулла ҡыҙының төрлө яҡтарҙа йәшәгән балалары һәр ваҡыт, йыраҡ алаларҙы яҡын итеп, әсәләренең хәлен белергә ҡайта. 90 йәшенә аяҡ баҫҡанда уның биш балаһынан 10 ейәне, 7 бүләһе бар.

Әсәйебеҙ “Йүрүҙән” гәзитен яратып уҡый һәм ошо баҫма аша уны юбилейы айҡанлы ҡотлайбыҙ, ныҡлы һаулыҡ, үҙенең аҡыллы кәңәштәре, тормошто яратыуы, эшмәкәрлеге менән беҙҙе һөйөндөрөп тороуын теләйбеҙ. Тағы ла оҙаҡ йылдар бәхетле йәшәргә яҙһын.
Әлмирә Хизбуллина.
Ишембай ауылы.