Черкассы ҡасабаһында Өфө районынан Бөйөк Ватан һуғышында ҡатнашыусы өс яугирҙең – Советтар Союзы Геройҙары Ф. М. Косолапов, П. А. Кулаков һәм Дан орденының тулы кавалеры М. А. Едренкин тураһында хәтерҙе мәңгеләштерҙеләр. Урындағы халыҡ ауылда тиҙҙән парк асырға йыйына – Геройҙар аллеяһы уның үҙәге буласаҡ.
Аллеяны булдырыуҙа фронтовиктарҙың бронза бюсын ҡуйыу тәүге мөһим аҙым булды. Уларҙы эшләтеү өсөн Черкассы ауыл советы хакимиәте ярҙам һорап “Транснефть – Урал “ акционерҙар йәмғиәтенә мөрәжәғәт итте. Был ойошма райондың иҡтисади, мәҙәни һәм ижтимағи тормошона, уның тотороҡло үҫешенә тос өлөш индерә. Предприятие был башланғысты хуплап, тулы комплекслы эштәрҙе – бюстарҙы эшләүҙән алып килтереп ҡуйыуға тиклем финанслауға яҡынса миллион һумлыҡ суммала хәйриә ярҙамы күрһәтте. Һуғыш яугирҙәре бюстары художестволы ҡойоу ысулы менән бронзанан яһалды, бетон-кирбес постамент гранит менән биҙәкләнде. Табличкаларға геройҙарҙың исеме һәм йәшәү йылдары гравировкалап яҙылды.
Бөйөк Ватан һуғышы яугирҙәре һәйкәлдәрен ремонтлау һәм урынлаштырыуҙа ярҙам күрһәтеү “Транснефть – Урал” акционерҙар йәмғиәтенең шәфҡәтлелек эшмәкәрлегенең мөһим өлөшө булып тора. Бөйөк Еңеүҙең 75 йыллығында предприятие эшмәкәрлек алып барған төбәктәрҙә 10-дан ашыу һәйкәл һәм мемориаль комплексты тәртипкә килтерергә ярҙам итте.
КОСОЛАПОВ Филипп Макарович, Советтар Союзы Геройы
2-се гвардия истребителдәр авиаполкының (1-се һауа армияһы) эскадрилья командиры. 300-гә яҡын хәрби осош яһай, шәхсән үҙе – 11 һәм төркөм менән 9 самолетты бәреп төшөрә.
КУЛАКОВ Петр Афанасьевич, Советтар Союзы Геройы
598-се артиллерия полкының (3-сө Белоруссия фронты) орудия командиры. 1944 йылдың июлендә Неман йылғаһының һул ярында (Белоруссия) П. Кулаковтың артиллерия расчеты 5 дошман танкының контратакаһын кире ҡаға, уларҙың өсөһөн шартлата. Ошо уҡ алышта П. Кулаков артеллеристары дошмандың 3 орудияһын һәм 100-гә яҡын һалдатын юҡ итә.
ЕДРЕНКИН Михаил Акимович, Дан орденының тулы (өс дәрәжәһе) кавалеры
35-се штурмлау инженер-сапер батальоны (1-се Украина фронты) саперы. Дошмандарҙың юлына мина һалыу, уларҙың ут нөктәләренә разведка яһау һәм күп миналарҙы зарарһыҙландырып, совет ғәскәрҙәренә Одер йылғаһын аша сыҡҡанда кисеү тәьмин итеүе өсөн ордендар менән бүләкләнгән.