Еңеүселәр араһында Башҡортостан егете лә бар

“Кара-Хаак” тау полигонында Рәсәй хәрбиҙәре уҙғарған конкурс “Алыҫ арауыҡҡа һыбайлы марафон” һәм “Ҡатнаш эстафета” өлөштәренән торҙо. Беренсе этапта ҡатнашыусылар һыбай килеш 130 километрҙы уҙырһа тейеш булһа, икенсе этапта йәйәү мөмкин тиклем ҡыҫҡа ваҡыт арауығында ҡаршылыҡтарҙы еңеп, штрафһыҙ ғына финишҡа барып етеү күҙалланған.

Тәүге урындарҙы алыусылар араһында Башҡортостан егете лә бар. Икенсе урынды яулаған Рязань гвардия юғары һауа десанттары команда училищеһынан ҡатнашҡан гвардия бүлеге командиры Вячеслав Горчаков - Стәрлетамаҡ ҡалаһынан.

Ярыш еңеүселәре августа халыҡ-ара кимәлдә үтәсәк Армия уйындарында (АрМИ - 2020) Рәсәй Федерацияһы Хәрби көстәре данын яҡлаясаҡ.

Вячеслав Горчаков 1999 йылдың 26 декабрендә Стәрлетамаҡ ҡалаһында тыуған. 2013 йылда, 8-се класҡа Рәсәй геройы А. В. Довлатов исемендәге Волга буйы федераль округының башҡорт кадет корпусына уҡырға ингән. Уҡыу йортонда беренсе көндәрҙә үк үҙен тик яҡшы яҡтан ғына күрһәткән, бихисап бәйгеләрҙең еңеүсеһе. Яҡташыбыҙға уңыштар юлдаш булһын!

Фото: асыҡ сығанаҡтарҙан