Мәҙәниәт министры Әминә Шафиҡова хәбәр итеүенсә, беренсе тапҡыр мәҙәниәт федераль кимәлдә өҫтөнлөклө йүнәлеш тип табылған һәм өс федераль проектты – «Мәҙәни мөхит», «Ижади кешеләр», «Һанлы мәҙәниәт»те үҙ эсенә ала. Республика бөтә өс федераль проектты ла тормошҡа ашырыуҙа ҡатнаша, сараларҙа бөтә муниципалитеттар ҙа йәлеп ителгән. Әминә Ивний ҡыҙы билдәләүенсә, төбәк проекттарын 6 йыл финанслауға 10 миллиондан ашыу аҡса бүленә. Иң күбе «Мәҙәни мөхит» төбәк проектын алып барыуға тотоноласаҡ. Милли проект барышында 27 яңы ауыл мәҙәниәт йорто төҙәләсәк, 52-һе төҙөкләндереләсәк. Әлеге йылдың аҙағына тиклем 5 объект сафҡа индерелә, 3 ауыл мәҙәниәт йорто төҙөлә. Мишкәлә төҙөкләндергәндән һуң мари тарихи-мәҙәни үҙәге асыла. Шуныһы ла иғтибарға лайыҡ: федераль ҡаҙна иҫәбенә сәнғәт мәктәптәре 63 пианино алды. Алдағы көндәрҙә ике колледж һәм 20 балалар сәнғәт мәктәбе лә яңы ҡоролмалы буласаҡ.