Республика иҡтисадына инвестициялар артҡан

Айырыуса төҙөлөш өлкәһендә, ауыл хужалығында һәм эшкәртеүсе производстволарҙа әүҙемлек күҙәтелә. Инвестицияларҙың 70 процентын тиерлек ҙур компаниялар һәм предприятиелар формалаштыра. Улар – «Башнефть», «Газпромнефтехим», Өфө моторҙар эшләү производство берекмәһе, Учалы тау-байыҡтырыу комбинаты, Полиэф, Башҡортостан сода компанияһы, Кроношпан һәм башҡа компаниялар. Башҡортостан Башлығы вазифаһын ваҡытлыса башҡарыусы Радий Хәбиров республиканың Инвестиция советы ултырышында ҡалған 30 проценттың кесе һәм урта эшҡыуарлыҡ предприятиеларына тура килеүен билдәләне. Беренсе ярты йыллыҡта уларҙың һаны 4 меңгә артып, 131 меңгә еткән.

Республика етәксеһе һүҙҙәренсә, инфраструктура яҡшыра, Иҡтисади үҫеш министрлығы өс индустриаль парк булдырыу өсөн ғаризаларҙы хуплаған.

«Алға, Башҡортостан!» әүҙем инвестициялар клубын ойоштороу тураһында указға ҡул ҡуйҙым. Эксперттар менән тығыҙыраҡ эшләү, яңы идеялар тыуҙырыу, ҡарарҙар ҡабул итеү, республикала эшҡыуарлыҡ мөхитен яҡшыртыу тураһында тәҡдимдәр әҙерләү өсөн беҙгә ошондай кәңәшләшеү майҙансығы кәрәк. Клуб бер нисә номинацияла «Йыл инвесторы» премияһын тапшыра һәм еңеүсене билдәләй. Беренсе ултырышты йыл аҙағында үткәрергә тәҡдим итәм», – тине Радий Хәбиров.

Төбәк етәксеһе йәнә республикала инвестицияларҙың ошолай артыуы тәүгә күҙәтелеүен һәм бының ҙур, яйға һалынған эш һөҙөмтәһе икәнен билдәләне. Уның фекеренсә, власть бизнесҡа ярҙам иткән осраҡта ғына шундай алға китеш булыуы мөмкин.

«Тағы шуны әйткем килә: республиканың ҙур предприятиелары үҙҙәре лә еңеп сығыр, үҙҙәренең инвестиция программалары бар, беҙгә иң мөһиме – уларҙың эргәһендә булыу. Беҙгә кесе һәм урта эшҡыуарлыҡҡа булышлыҡ итергә, инвестициялар йәлеп итеү өҫтөндә әүҙем эшләргә кәрәк», – тине төбәк етәксеһе.

“Башинформ”.