Ауылдың буласаҡ мәҙәниәт йорто Мөрсәлим ауыл биләмәһе хакимиәте эргәһендә урынлаша. Бындағы ағастарҙы киҫеп, төҙөлөш майҙанын кәртәләп алып, фундаментҡа котлован ҡаҙылған. Бинаның әле нигеҙе күтәрелә башлаған.
– Төҙөлөш эштәрен Өфөнөң “Башальянсстрой” яуаплылығы сикләнгән йәмғиәте башҡара, – ти Мөрсәлим ауыл биләмәһе башлығы Альберт Садиҡов. – Мәҙәниәт йорто 200 тамашасы урынына иҫәпләнгән. Бинала өс түңәрәктәр залы, моделле китапхана, полиция участковыйы бүлмәһе буласаҡ. Ул бер ҡатлы итеп, заман талаптарына ярашлы төҙөләсәк. Яңы объектты быйыл декабрҙә файҙаланыуға тапшырыу күҙаллана.
Хәтерегеҙгә төшөрәбеҙ, Мөрсәлимгә яңы мәҙәниәт йорто төҙөү мәсьәләһе күптән күтәрелә. Былтыр Башҡортостан Башлығы вазифаһын ваҡытлыса башҡарыусы Радий Хәбиров төньяҡ-көнсығышҡа эш сәфәре барышында ауылға яңы мәҙәниәт усағы төҙөргә тигән бурыс ҡуйҙы. Ә әлегә Мөрсәлимдә клуб бинаһы уҙған быуатта һалынған бәләкәй генә, бөгөнгө талаптарға тап килмәгән бинала урынлашҡан.