Бәләкәй Камилдың ҙур шатлығы

Лаҡлы ауылынан 8 йәшлек Камил Хәйретдиновтың да тап ошо осорҙа хыялы тормошҡа ашты. Малай күптәнән уйынсыҡ тимер юл хаҡында хыялланған һәм был хаҡта республика Башлығы Радий Хәбировҡа яҙып ебәргән. Уның хаты, “Теләктәр шыршыһы” Бөтә Рәсәй хәйриә акцияһына ярашлы, Радий Фәрит улының ҡулына эләккән. Республика Башлығы малайҙың теләген үтәйәсәген белдерҙе һәм һүҙендә торҙо. 

Яңы йыл алдынан Салауат районы хакимиәте башлығы Марс Кашапов Радий Хәбировтың бүләген – тимер юлды Камилдың өйөнә алып барып тапшырҙы. Был ысын мәғәнәһендә байрамға әүерелде. Малайҙы Лаҡлы ауыл биләмәһе башлығы Ира Сәйфуллина, Ҡыш Бабай менән Ҡарһылыу һәм әкиәт персонаждары ла ҡотларға килгәйне. Улар малайҙы байрам менән тәбрикләп,  бүләктәр тапшырҙы. 

Хәйретдиновтар – Лаҡлы ауылының өлгөлө ғаиләләренең береһе. Ғаилә башлығы Алис Африкан улы – хаҡлы ялда, уның хәләл ефете Нурия Ғилметдин ҡыҙы кафела эшләй. Улар өс ул тәрбиәләп, уларҙы аяҡҡа баҫтырғандар. Оло улдары Айвар Себерҙә эшләй, уртансылары Шамил бөгөн әрмелә хеҙмәт итә. Кескәйҙәре Камил, һаулығы буйынса мөмкинлеге сикләнгән булыуына ҡарамаҫтан, мәктәпкә йөрөй. Ул беренсе класта белем ала. 

– Республика, район, ауыл биләмәһе етәкселегенә беҙҙе ҙурлап, шундай матур-матур бүләктәр алып килгәндәренә бик ныҡ рәхмәтлебеҙ, – тип шатлыҡтарын йәшермәне Хәйретдиновтар. 

Ысынлап та, бәләкәй Камилдың шатлығы ҙур ине. Уның йөҙөнән йылмайыу китмәне, бүләктәргә рәхмәт әйтеп, ҡунаҡтар менән әйлән-бәйлән уйнаны.