Башҡортостанда 3,5 миллиард һумға һөтсөлөк фермаһы төҙөлә

ВТБ банкы менән кредит килешеүенә ҡул ҡуйыу өсөн ике йыл эшләгән, тип асыҡлыҡ индерҙе Калинин исемендәге ЯСЙ директоры Николай Коваленко. Ул Стәрлетамаҡ районының Көньяҡ ҡасабаһы эргәһендә төҙөлөп ятҡан һөтсөлөк комплексының уникаль булыуын билдәләне.

«3 миллиард һумдан ашыу суммаға кредит килешеүе һөт малсылығы буйынса инвестиция проектын ғәмәлгә ашырырға мөмкинлек бирә. Технологик яҡтан ҡыҙыҡлы проект, әлегә ул республикала булмаған: 3,5 мең фураж һыйыры моноблокта урынлашасаҡ, корпустар һаны аҙ, өҫтәүенә тоҡомло башмаҡтар үҫтереү майҙансығы буласаҡ. Беҙҙә һауыу залы бар. Беҙ ВТБ банкы менән берлектә ике йыл дауамында төрлө моделдәрҙе өйрәндек, технологияларҙы өйрәндек һәм шундай һөҙөмтәле вариант таптыҡ, беҙҙеңсә, был инвестиция проектын ваҡытында тормошҡа ашырырға һәм кредитты ҡыҫҡа ваҡытта түләргә мөмкинлек бирәсәк», - тине Николай Коваленко.

ВТБ-ның Башҡортостандағы идарасыһы Станислав Морилов билдәләүенсә, банк ауыл хужалығы өлкәһендәге проекттарҙы тормошҡа ашырҙы ла инде, ләкин әлеге килешеү хәҙер төбәктең аграр өлкәһендәге кредит учреждениеһы өсөн иң ҙуры.

«Проект беҙҙең өсөн ҡыҙыҡлы, уға бигерәк тә аңлайышлы, асыҡ, ышаныслы партнер менән ҡул ҡуйҙылар, - тине Станислав Морилов, - республиканың аграр секторы әүҙем үҫешһен өсөн барыһын да эшләйәсәкбеҙ».

Николай Коваленко һүҙҙәренсә, һөтсөлөк комплексы 80 процентҡа тиерлек төҙөлгән. Ул тулы ҡеүәтенә эшләй башлағас, көнөнә 115 тонна һөт эшкәртеүгә оҙата аласаҡ. Шулай уҡ комплекстан йыл һайын һатыуға 600 самаһы тоҡомло башмаҡ йүнәлтеү күҙаллана.

Белешмә өсөн: 14-16 декабрҙә Өфөлә Халыҡ-ара бизнес аҙналығы үтә. Йыл һайын үткәрелеүсе иҡтисади сара 3000-дән ашыу кешене: власть, бизнес-берләшмә вәкилдәрен һәм төрлө өлкә белгестәрен берләштерә. Юбилейлы Форум даирәләрендә 50-нән ашыу эшлекле сара ойошторола, унда федераль һәм халыҡ-ара кимәлдәге 500-ҙән ашыу спикер сығыш яһай. «Башҡортостан сода компанияһы» акционерҙар йәмғиәте, «Башкирэнерго» яуаплылығы сикләнгән йәмғиәте, «Бэск» акционерҙар йәмғиәте форумдың стратегик партнерҙары булып сығыш яһай. Форумда 24 ил: Иран, Белоруссия, Әрмәнстан, Һиндостан, Ҡытай, Пакистан, Үзбәкстан, Италия, Төркиә, Бөйөк Британия, Латвия, Монголия, Бахрейн, Никарагуа, Ҡаҙағстан, Индонезия, Мали, Босния һәм Герцеговина, Куба, Чехия, Германия һәм Франция ҡатнаша.