Һуңғы биш йылда төбәк аграрийҙары 29 меңдән ашыу тоҡомло йәш мал һатып алған.
– Төбәктә тоҡомло мал һатып алыуҙа дәүләт ярҙамының актуаль саралары булышлыҡ итте, – тине республиканың аграр ведомствоһы башлығы. – Өҫтәүенә республикала субсидияны илебеҙҙән йәш малды һатып алыу өсөн генә түгел, ә сит илдән дә алыуға бирәләр. Төбәккә голштин тоҡомло башмаҡтар килтерелде. Улар урындағы шарттарға яраҡлаштырылған. Төбәк эсендә лә селекция-тоҡомсолоҡ эшен камиллаштырыу өсөн яҡшы шарттар бар. Беҙҙә 79 тоҡомсолоҡ ойошмаһы эшләй, уларҙың 50-һе һөт малсылығы өлкәһендә эшмәкәрлек алып бара һәм республика йыл һайын ошо йүнәлеш өсөн тоҡомсолоҡ материалдарына ихтыяжының яртыһын тәьмин итә.
Белешмә өсөн:
Ауыл хужалығы тауарҙары етештереүселәренә Башҡортостанда тоҡомло эре мөгөҙлө мал һатып алыу сығымдарҙың 50 проценты күләмендә субсидиялана, әммә бер баш малға 60 мең һумдан артыҡ түгел.