ИРТӘГӘ ОНЛАЙН-ДИКТАНТ ЯҘАБЫҘ

– Бөгөнгә сайтта 1200-ҙән ашыу кеше теркәлгәне беҙгә билдәле. Әлбиттә, ул һандар Салауат районында шунса ҡатнашыусы башҡорт теленән диктант яҙасаҡ тигәнде аңлатмай. Башҡа ысул менән ошо мөһим сарала ҡатнашырға теләүселәр ҙә бар, – тине мәғариф бүлегенең мәғлүмәт-методик үҙәге мөдире Люциә Ғабдрахманова.

Хәтерегеҙгә төшөрәбеҙ, иртәгә, 25 апрелдә, Башҡорт теленән халыҡ-ара онлайн-диктант уҙғарыла. Быйыл ул, донъялағы һәм илдәге эпидемиологик хәл менән бәйле, тәүге тапҡыр онлайн форматта ойошторола. Диктант иртәнге 11.00 сәғәттә башлана. Акцияла ҡатнашыу өсөн https://bashkdictant.ru/ сайтында теркәлергә кәрәк.

Диктантҡа Башҡортостан юлдаш телевидениеһындағы “тура эфир” ваҡытында, “Бәйләнештә”, “Instagram” социаль селтәрҙәрендә, YouTube-каналында, https://bashkdictant.ru/ сайтында ҡушылырға мөмкин.

Белешмә өсөн: башҡорт теленән диктант 2015 йылдан бирле үткәрелә. 2019 йылда акцияла 69 687 кеше ҡатнашты һәм ул халыҡ-ара статусын алды. Уларҙың 3 511-е онлайн-майҙансыҡтарҙа яҙҙы. Салауат районында сарала дөйөм 1226 кеше ҡатнашты.

Быйыл Халыҡ-ара диктантта ҡатнашыу өсөн йәмғеһе 67 мең кеше теркәлгән. Улар араһында Санкт-Петербург, Свердловск, Силәбе өлкәләре, Каменск-Уральский, Екатеринбург, Кировоград, Мәскәү, Ноябрьск ҡалалары, Яҡут Республикаһы һәм Краснодар крайы вәкилдәре бар. Шулай уҡ башҡа илдәрҙән: Үзбәкстан, Ҡаҙағстан (Нурсолтан, Алматы), Швейцария (Женева), АҠШ (Лос-Анджелес, Нью-Йорк), Испания, Эстония, Төркиә (Истанбул, Анталия, Фетхие, Эскешихер), Германия (Берлин), Ҡытайҙан (Пекин, Гуанчжоу) ҡатнашыусылар ҙа теркәлгән.