Бөтә яңылыҡтар
8 Август 2019, 18:16

Петрушка аш тәмләткес кенә түгел

Баҡсаһында петрушка үҫтермәгән кеше бармы икән ул?Күпселек уны аш тәмләткес булараҡ ҡуллана, шулай бит? Әммә уның шулай уҡ дауалау үҙенсәлектәре хаҡында ла онотмайыҡ.

Баҡсаһында петрушка үҫтермәгән кеше бармы икән ул?

Күпселек уны аш тәмләткес булараҡ ҡуллана, шулай бит? Әммә уның шулай уҡ дауалау үҙенсәлектәре хаҡында ла онотмайыҡ.
Был маҡсатта япраҡтары ла, тамыры һәм айырыуса орлоҡтары ҡулланыла. Япраҡтарын июнь-август айҙарында йыйып алалар, ә тамырын – август-сентябрҙә.
Составында бик күп миҡдарҙа калий булыуы менән петрушка йөрәк-ҡан тамырҙары системаһы ауырыуҙары һәм һейҙек бүленеүе проблемалары, шулай уҡ шәкәр сире ваҡытында айырыуса файҙалы.

Бөйөр һәм шешенеүгә килтереүсе йөрәк-ҡан тамырҙары ауырыуҙарында, һейҙек ҡыуығында таш булғанда, цистит һәм уретрит сирҙәре ваҡытында петрушканың орлоғон һейҙек ҡыуҙырыусы сара булараҡ киң ҡулланалар.

1. 4 сәй ҡалағы ваҡланған петрушка орлоғон 1 стакан ҡайнар һыуға һалырға һәм талғын ғына утта 10-12 минут ҡайнатып алғас һыуытырға, унан һөҙөп алырға. Шул төнәтмәне көнөнә 4-6 тапҡыр 1-әр аш ҡалағы эсергә. Был рецепты цистит булған осраҡта ҡулланыу яҡшы. Балаларға дозаны сәй ҡалағы менән билдәләргә кәрәк.

2. 1 сәй ҡалағы орлоҡто 1 стакан һалҡын һыуға һалып 8 сәғәт дауамында төнәтәләр. Шуны көнөнә 4 тапҡыр 1/3 стакан күләмендә эсәләр.

3. 20 гр ваҡланған петрушка япраҡтарын һәм тамырын 1 стакан ҡайнап торған һыуға һалып төнәтергә ҡуйығыҙ. Төнәтмәне ашар алдынан көнөнә 3 тапҡыр 1/3 стакан эсергә.

Был рецепт простатиттан дауаланыу өсөн дә тәҡдим ителә.



Күҙ ҡабаҡтары шешенгәндә

Бер бәйләм петрушка япраҡтарын ваҡ итеп турап, 1 литр ҡайнап торған һыуға һалырға һәм 1-3 сәғәт дауамында төнәткәндән һуң һөҙөп алырға. Шуның менән күҙ ҡабаҡтарына примочка яһарға. Ваҡ ҡына ыуғыстан үткәрелгән петрушка тамырынан “бутҡаны” күҙ өҫтөнә ябып. 20 минут тоторға һәм һуңынан йылымыс һыу менән йыуып алырға кәрәк.

Петрушка япраҡтарын серәкәй тешләгән, бал ҡорто, һағыҙаҡ саҡҡан урынға ябыу ҙа файҙалы. Ә төйөлгән орлоҡтарын баш пеләшләнеү осрағында баш тиреһенә һөртәләр. Тамырын ҡайнатҡан һыу менән ҡояшта янған битте йыуыу яҡшы. Ә ҡуйы ҡайнатмаға лимон һутын ҡушып, иртә һәм кисен биттәге һипкелдәрҙе һәм пигмент таптарҙы бөтөрөү мөсөн файҙаланалар.


Иғтибар! Шуныһын да иҫтән сығармағыҙ: бөйөрҙә нефрит ауырыуы булһа, петрушка препараттарын ҡулланырға ярамай. Шулай уҡ йөклө ҡатын-ҡыҙҙарға ла тыйыла. Петрушка йөклөлөк осоро айырыуса ауыр үтә торған һәм йәш бала төшөү проблемаһы булған ҡатын-ҡыҙҙар өсөн ҡурҡыныс.