Лаҡлы мәмерйәһенә асфальт юл түшәлә

“Янғантау” геопаркын үҫтереү һәм “проблемалы” юлдарҙы йүнәтеү программаларына ярашлы, ошо маҡсатҡа республика ҡаҙнаһынан аҡса бүленгән. Эштәр киләһе аҙнала башлана.

Салауат юл ремонт-төҙөлөш идаралығы начальнигы Ришат Сафин хәбәр итеүенсә, комиссия менән урынға барып, эш күләме баһаланған. Юл тәүҙә нығытылып, өҫтөнә асфальт түшәләсәк. Малаяҙ – Лаҡлы – Үрге Ҡыйғы – Үңкүрҙе автомобиль юлы эргәһенә 20 урынлыҡ автотуҡталҡа эшләнәсәк. Йәйәүлеләргә мәмерйәнең тау итәгенә тиклем уңайлы тротуар төҙөләсәк. Лаҡлы мәмерйәһе – ЮНЕСКО-ның "Янғантау" геопаркының төп объекттарының береһе. Йыл һайын бында меңәрләгән турист килә, ул глобаль геопарктың биш төп маршрутына индерелгән.

Шулай уҡ Салауат районында Миәшәгәр – Торналы – Мөрсәлим автомобиль юлының Йыланыш ауылы (9,2 – 12,2 км) һәм Лағыр ауылы (30,8 – 33,1 км) эргәһендәге участкаларын ремонтлау планлаштырыла. Хәҙер проект дәүләт экспертизаһында, унан һуң аукцион иғлан ителәсәк. Эштәрҙе август-сентябрҙә башҡарыу планлаштырыла.